🪧 ვეძებთ “ოცნების” 1.200.000 მხარდამჭერს

“ოცნება” ამბობს, რომ მას 1.2 მილიონი მხარდამჭერი გყავს. ჩვენ ვეძებთ მათ, რათა დავუსვათ შეკითხვა:

რატომ უჭერენ მხარს კრიმინალურ ორგანიზაციას?

“ოცნება” ასობით ათას დოლარს ხარჯავს ტელევიზიებში თუ სოციალურ მედიაში და ტროლებში რათა შექმნას ილუზია, რომ უმრავლესობა მის მხარეს არის. თუმცა, რეალურ სამყაროში, ყოველდღიურობაში, საეჭვოდ რთულდება მისი ნამდვილი მხარდამჭერის პოვნა. ან, საძებნელი რატომ უნდა იყოს?!

ვგულისხმობთ რეჟიმის მიუკერძოებელ ამომრჩეველს, ვისაც რეჟიმი პირდაპირ ან ირიბად არ აფინანსებს (მაგალითად, ბიუჯეტზე 1.200.000 ადამიანია დამოკიდებული), ან ვისაც მეთადონის პროგრამიდან ჩახსნით არ აშინებს. თუ ასეთი ადამიანის პოვნა გაგვიჭირდება, თანახმა ვართ ასეთ ამომრჩეველსაც ვესაუბროთ, თუმცა, ჩვენთვის უფრო საინტერესო იდეოლოგიურ მხარდამჭერებთან საუბარი.

ამიტომ, ჩვენ:

ვეძებთ “ოცნების” 1.200.000 მხარდამჭერს, რათა ვკითხოთ – რატომ უჭერენ მხარს კრიმინალურ ორგანიზაციას.

თუ ასეთ ადამიანებს ვერ ვიპოვით, ამას ორიდან ერთი ახსნა შეიძლება ჰქონდეს:

1. არ არსებობენ
2. არსებობენ, თუმცა საკუთარი პოზიციის ხმამაღლა გაჟღერების ერიდებათ

🪧 გიწვევთ სასაუბროდ

ჩვენი პოზიცია ასეთია:

“ოცნება” კრიმინალური ორგანიზაციაა, მისი ამომრჩეველი – თანამზრახველი.

ამას შეურაცხყოფისთვის არ ვამბობთ. გააზრებულად თუ გაუაზრებლად, ეს ასეა. აქ გაგიზიარებთ ჩვენს განმარტებას და გამოგიწვევთ სასაუბროდ, თუ სურვილი გექნებათ დაიცვათ თქვენი პოზიცია.

ჩვენი პოზიცია, ორი ნაწილისგან შედგება:

1. “ოცნება” კრიმინალური ორგანიზაციაა

“ოცნება” ცდილობს ბევრ საკითხზე ერთდროულად გვალაპარაკოს – გეოპოლიტიკაზე, ჩინეთის ინტერესებზე, “ნაციონალურ მოძრაობაზე”, სოროსზე, დიფ სთეითზე, გლობალური ომის პარტიაზე, უბრალოდ ომის პარტიაზე, ტრამპზე, პუტინზე, ბაიდენზე, ევროკავშირის უარყოფით მხარეებზე, თბილისის მერის წალენჯიხაში ფერარით გასეირნებაზე…

ჩვენი მიზანია არ ავყვეთ ამ ხმაურში და ვისაუბროთ ერთ, მკაფიო საკითხზე: ძალადობა და უსამართლობა. ყველაფერი აქედან იწყება. შეიძლება მოგწონდეთ რუსეთი, ჩინეთი ან ირანი. ჩვენ არ და ვერ დაგაძალებთ ევროპულ სტანდარტებს. მაგრამ, ამაზე უნდა ვისაუბროთ და ხალხმა გამოიტანოს დასკვნა.

როდესაც ჩვენი არგუმენტები გაშინებთ და ძალით ცდილობთ ჩვენს გაჩუმებას, პოლიციით, სასამართლოთი, ტიტუშკებით, 1 დღეში დაწერილი კანონებით, გეოპოლიტიკაზე მსჯელობა აღარ გამოვა. ჯერ ამ ძალადობას და უსამართლობას უნდა გაეცეს პასუხი.

სწორედ ამიტომ გაურბიან ამ შეკითხვას “ოცნების” წარმომადგენლები:

• მაგალითი 1 – “რატომ არ არის გამოძიება დაწყებული?” “ანუ გეებს მივცეთ ქორწინების საშუალება?”
• მაგალითი 2 – “რატომ არ არის ჟურნალისტებზე ძალადობის არცერთი ფაქტი გამოძიებული?” “რაც შეეხება არასამთავრობო ორგანიზაციებს…”

თუ არ მისცემ თავის არიდების საშუალებას, გეტყვის რომ სამწუხაროა და გამოძიებას უნდა დაველოდოთ. თუ კითხავ, რატომ არ არის გამოძიებული არცერთი ფაქტი 2019 წლიდან, გარბის ან შეურაცხყოფაზე გადმოდის.

“ოცნებამ” იცის, რომ ერთი დამნაშავის დასჯას ჯაჭვური რეაქცია შეიძლება მოყვეს – სხვა დამნაშავეებიც დასასჯელი გაუხდეს, საბოლოოდ კი – საკუთარი თავის გასამართლება მოუწიოს.

2. ..მისი ამომრჩეველი – თანამზრახველი

თუ ვთანხმდებით, რომ “ოცნება” კრიმინალური ორგანიზაციაა, მისი ამომრჩეველი და მხარდამჭერი თანამზრახველი გამოდის. ეს არ არის პოლიტიკური გემოვნების საკითხი, ეს ფაქტია. თანამზრახველს სხვადასხვა მიზეზი შეიძლება ჰქონდეს – “ნაცები რომ არ დაბრუნდნენ”, დასავლეთმა კაცები რომ არ გაგვითხოვოს, უკეთესს ვერავის ხედავს.. შეიძლება ფარული მიზეზებიც ჰქონდეთ – ფული, ტენდერი, დასაქმება, ჩაწყობა…

ზოგიერთ თანამზრახველს შეიძლება გააზრებული აქვს “ოცნება” რომ კრიმინალური ორგანიზაციაა, ზოგიერთს კი – არა, არცოდნა რომ არცოდვაა – ისე. ზოგი ჩვენი ახლობელია, ზოგს არ ვიცნობთ, ზოგიც გვიყვარს და გვჯერა, რომ დადგება სწორ მხარეს, მასზე უარს არ ვამბობთ.

ამ არგუმენტებზე შეგვიძლია ვისაუბროთ, თუმცა, ეს არ ცვლის მოცემულობას – კრიმინალურ ორგანიზაციასთან ამა თუ იმ მიზეზით თანამშრომლობა, მისი თანამზრახველობაა.

❓ რის მიღწევას ვცდილობთ?

ჩვენ არ და ვერ მოგახვევთ ჩვენს აზრს. არ მოგიწოდებთ, რომ რუსეთს ევროპა არჩიოთ, ან უმეგობროდ დარჩენას – მეგობრის ყოლა. არც ვინმესთან ნიშნისმოგებით საუბარია ჩვენი მიზანი.

მხოლოდ გვინდა შეგახსენოთ “ოცნების თანამზრახველებს”, რომ “ოცნების” ტელევიზიების შეკოწიწებული ტყუილის მიღმა სიმართლეს ცხადად ვხედავთ – თქვენ აფინანსებთ, აძლიერებთ, მხარს უჭერთ კრიმინალურ ორგანიზაციას. თქვენი წილი პასუხისმგებლობა გაქვთ ამ პროცესში.

ნუ მოვიტყუებთ თავს, დავაფიქსიროთ პოზიცია. თუ თქვენ იტყვით, რომ დიახ – არ გადარდებთ მოძალადეები და კანონდამრღვევები რომ არ ისჯებიან, რადგან ასე გაწყობთ, ასე იღებთ სარგებელს, ჯობს ეს ვიცოდეთ, რომ თქვენი მიდგომა ასეთია, რომ სიმართლე მორევაზეა.

თუმცა, ამის თქმა რთულია, ამიტომ გთავაზობთ შემოგვიერთდე უკეთესი ალტერნატივის ძიებაში.

თუ სიმართლის თქმა არ გინდა, არც სწორ პოზიციაზე გადმოსვლა, მაშინ გეტყვით, რომ რამდენჯერაც პროპაგანდის მყიფე არგუმენტს გააჟღერებ, იმდენჯერ მიიღებ პასუხს, გაგიჭირდება ამ ტყუილის დაცვა და მისი გავრცელება საზოგადოებაში.

💬 როგორ ვისაუბროთ?

თუ არ ეთანხმები ჩვენს პოზიციას და მზად ხარ გვესაუბრო, ორ გზას გთავაზობთ:

• გამოგველაპარაკე თუ დაგვინახავ ქუჩაში, პროტესტის დროს
• გამოგვეხმაურე ამ საკონტაქტო ფორმით და ონლაინ-რეჟიმში ვისაუბროთ

ჩვენ ერთხელ უკვე გვქონდა ასეთი მცდელობა, სადაც ასობით გამოხმაურება მივიღეთ, თუმცა, ძირითადად ტროლებისგან ან აგრესიული საჯარო მოხელეებისგან. საუბარზე კი არცერთი მათგანი არ დაგვთანხმდა.

იმედს ვიტოვებთ, რომ ამჯერად ვიპოვით ასეთ ადამიანებს.

📜 შეჯამება

ჩვენ ვთვლით, რომ “ოცნება” კრიმინალური ორგანიზაციაა. ამის ახსნა ბევრი ფაქტით და არგუმენტით შეგვიძლია.

შესაბამისად, ვთვლით, რომ “ოცნების” მხარდამჭერი მისი თანამზრახველია. მიუხედავად იმისა, თუ რის გამო უჭერს მხარს.

ამიტომ, გიწვევთ სასაუბროდ ამ ადამიანებს, ვისაც სხვა პოზიცია გაქვთ, ვისაც შეგიძლიათ საკუთარი პოზიციის დაცვა.

იმედს ვიტოვებთ, რომ 1.200.000 ადამიანიდან 10 ადამიანს ვიპოვით და დავუსვამთ ამ შეკითხვებს.