🤔 სად არის „ოცნების“ 1.200.000 მხარდამჭერი?

“ოცნება” ამბობს, რომ მას 1.2 მილიონი მხარდამჭერი ჰყავს. ის სწორედ ამ მხარდამჭერების, “ამომრჩეველთა უმრავლესობის” სახელით საუბრობს, როდესაც იღებს რეპრესიულ კანონებს, იყენებს ძალას, აპატიმრებს მოქალაქეებს. “ასეთია დაკვეთაო” – ამბობს.

უმრავლესობის სურათის გასაძლიერებლად, “ოცნება” ასობით ათას დოლარს ხარჯავს ტელევიზიებში და სოციალურ მედიაში – კოორდინირებულ კამპანიებში, ტროლებში, ბოტებში.

ჩვენ ვამბობთ:

“ოცნება” კრიმინალური ორგანიზაციაა

შეურაცხყოფისთვის კი არ ვამბობთ ასე, არამედ ლოგიკურ, არგუმენტირებულ, ფაქტებით გაჯერებულ დასკვნას გთავაზობთ.

ამიტომ ვეჭვობთ – შეიძლება კი 1.2 მილიონი ადამიანი მხარს უჭერდეს კრიმინალურ ორგანიზაციას? თუ კი – რას ხედავენ ისეთს, რასაც ჩვენ ვერ ვხედავთ? რით ამართლებენ ამ მხარდაჭერას?

ეჭვს გვიძლიერებს ისიც, რომ რთულია ასეთი მხარდამჭერის პოვნა – როგორც კი გავცდებით ინტერნეტ სივრცეს და გავალთ გარე სამყაროში, ავტობუსის გაჩერებაზე, მეტროში, ქუჩაში, ბაზარში… საქართველო პატარა ქვეყანაა, 1.2 მილიონი ადამიანი რთული საპოვნელი არ უნდა იყოს.

ამიტომ:

ვეძებთ 10 ადამიანს ამ 1.2 მილიონიდან, ვინც მზად არის დაიცვას საპირისპირო პოზიცია.

ვეძებთ 10 “რეალურ” მხარდამჭერს, ვინც არ არის “ოცნებაზე” დამოკიდებული ფინანსურად ან არ ეშინია მისი. თუ გაგვიჭირდა 10 დამოუკიდებელი მხარდამჭერის პოვნა, არც ასეთ “დაინტერესებულ” მხარდამჭერებთან საუბარზე ვიტყვით უარს.

ბევრი ამბობს, რომ არსებულ მთავრობას რეალური, იდეოლოგიური მხარდამჭერი არც ჰყავს, ის დგას ადამიანებზე, ვინც, სხვადასხვა მიზეზით, იტანს ამ რეჟიმს, ამიტომ მათთან “სიმართლეზე” საუბარი არაფრისმომცემია – ისედაც იციან. ჩვენ გვსურს გადავმოწმოთ ეს დაშვება – არის თუ არა ასე?

საბოლოოდ, გვინდა პასუხი გავცეთ შეკითხვას:

არსებობს კი ეს 1.2 მილიონი მხარდამჭერი? და თუ არსებობს, რატომ ერიდებიან ისინი პოზიციის საჯაროდ დაცვას?

🪧 გიწვევთ სასაუბროდ

ჩვენი პოზიცია ასეთია:

“ოცნება” კრიმინალური ორგანიზაციაა. მისი მხარდაჭერა არ არის მხოლოდ პოლიტიკური გემოვნების საკითხი.

აქ გაგიზიარებთ ჩვენს განმარტებას და მოგიწვევთ სასაუბროდ, თქვენი პოზიციის დასაცავად.

ჩვენი პოზიცია, ორი ნაწილისგან შედგება:

1. “ოცნება” კრიმინალური ორგანიზაციაა

“ოცნება” ცდილობს ბევრ საკითხზე ერთდროულად გვალაპარაკოს – გეოპოლიტიკაზე, ჩინეთის ინტერესებზე, “ნაციონალურ მოძრაობაზე”, სოროსზე, დიფ სთეითზე, გლობალური ომის პარტიაზე, ტრამპზე, პუტინზე, ბაიდენზე, ევროკავშირის უარყოფით მხარეებზე…

ჩვენი მიზანია არ ავყვეთ ამ ხმაურში და ვისაუბროთ ერთ, მკაფიო საკითხზე: სისტემური ძალადობა და უსამართლობა. ყველაფერი აქედან იწყება. შეიძლება მოგწონდეთ რუსეთი, ჩინეთი ან ირანი. მაგრამ, ამაზე უნდა ვისაუბროთ და ხალხმა გამოიტანოს დასკვნა. საუბრისას კი არგუმენტმა უნდა გაიმარჯვოს და არა ძალამ. სანამ ეს პირიქით ხდება, სხვა საკითხებზე საუბარი ნაადრევია.

🤔 რატომ ვთვლით, რომ “ოცნება” კრიმინალური ორგანიზაციაა?

შეგვიძლია ვისაუბროთ ზოგად კრიმინალზე, კორუფციაზე. კორუფციაში მხილებული ადამიანის ორჯერ გაპრემიერებაზე, კორუმპირებულ მინისტრებზე, სუსის უფროსზე, რომელიც ქოლცენტრებს მფარველობს და საბავშვო ბაღებს პარავს ბიუჯეტს, მილიონერ პარლამენტარებზე, ბათუმის მერის საეჭვო ვითარებაში დაჭრაზე, მთავარი პროკურორის მიერ შეკვეთილ მკვლელობაზე, ეროვნულ ბანკზე, რომელმაც ამ პროკურორისთვის სასწრაფო წესით კანონი მიიღო და სანქციების არიდებაში დაეხმარა, და ა.შ.

ამასთან – ეს ადამიანები იზოლაციაში მუშაობდნენ? მათი მოადგილეები? მათთან გარიგებული სხვა ადამიანები? “საქმეში ჩართული” ნათესავები? მეგობრები?

ამ ფაქტებს “ოცნებაც” აღარ მალავს და თვითონ უკეთ გვიყვება.

ჩვენ სხვა დანაშაულზე მოგიყვებით. “ოცნების” მხარდამჭერები ხშირად ასე ამართლებენ ხოლმე კორუფციულ დანაშაულებს – “კი, იპარავს მაგრამ არ ძალადობს მაინც”.

ჩვენ სწორედ ძალადობაზე მოგიყვებით. იმაზე, რაც პირადად გადაგვხდა, პირადად გამოვცადეთ, რაც მარტივი დასანახია და რაზე საუბარსაც “ოცნება” მუდმივად გაურბის.

სისტემური ძალადობა და დაუსჯელობა
ძალადობა ყველგან შეიძლება მოხდეს. მაგრამ, როდესაც ძალადობა არ ისჯება და მეტიც – რეგულარული, სისტემური და ორგანიზებული სახე აქვს, ეს უკვე მთავრობის დანაშაულად იქცევა. მთავრობას, რომელიც ახალისებს და აორგანიზებს დანაშაულს, შეგვიძლია ვუწოდოთ კრიმინალური მთავრობა.

შეგვიძლია “ოცნებისვე” არგუმენტი მოვიყვანოთ ამ ლოგიკის დასტურად.

პროტესტის მონაწილეებზე მასიური ძალადობა
პროტესტის ასობით მონაწილეს სცემა პოლიციამ თუ გდდ-მ. ათეულობით მათგანის ჰოსპიტალიზება გახდა საჭირო. დაუმტვრიეს სახის ძვლები, მიაყენეს მძიმე დაზიანებები სახისა და თავის არეში.

დაკავებულის და გაკავებულის სასტიკი ცემა და დამცირება
დაზიანებული მოქალაქეების უმრავლესობა ნაცემია დაკავების შემდეგ, პოლიციის მიერ, ჯგუფურად და სასტიკად. ცემის დროს უღებდნენ ვიდეოს, აგინებდნენ, აფურთხებდნენ, ართმევდნენ პირად ნივთებს, მათ შორის მობილურ ტელეფონებს.

არა ერთეული შემთხვევები, არამედ კოორდინირებული ძალადობა
აქციის მონაწილეებზე ფიზიკური თავდასხმა მხოლოდ აქციაზე არ ხდება. აქტიურ მონაწილეებს უსაფრდებიან და თავს ესხმიან სხვადასხვა ბანდები, ე.წ. “ტიტუშკები”.

0 დასჯილი ასობით მტკიცებულების მიუხედავად
უამრავი, მკაფიო, პირდაპირი მტკიცებულების არსებობის მიუხედავად, დასჯილია 0 ძალოვანი. 2019 წლიდან, “გავრილოვის ღამიდან” ერთი საქმეც არ გამოძიებულა. არაერთი ფაქტორი მიუთითებს იმაზე, რომ ამ საქმეების გამოძიება და კანონდამრღვევის დასჯა არ არის “ოცნების” ინტერესში, პირიქით, ეს ძალადობა ინსტრუმენტია მათ ხელში იმის გადასაფარად, რაც არგუმენტით არ აიხსნება.

→ ყველა ამ არგუმენტზე მეტი ინფორმაცია, მასალა, კონტრ-არგუმენტი, წყარო შეგიძლია ნახო აქ: გადასვლა

“ოცნებამ” იცის, რომ ერთი დამნაშავის დასჯას ჯაჭვური რეაქცია შეიძლება მოყვეს – სხვა დამნაშავეებიც დასასჯელი გაუხდეს, საბოლოოდ კი საკუთარი თავის გასამართლება მოუწიოს. ამიტომ გააგრძელებს ის საუბარს ყველაფერ სხვაზე, ჩვენ კი გავაგრძელებთ საუბარს კრიმინალზე.

2. ..მისი მხარდაჭერა არ არის მხოლოდ პოლიტიკური გემოვნების საკითხი

კრიმინალური ორგანიზაციის მხარდაჭერა აღარ არის მხოლოდ პოლიტიკური გემოვნების საკითხი. ეს პასუხისმგებლობის გაზიარებაა. იმის მიუხედავად, თუ რა მოტივით ხდება ეს.

მოტივი სხვადასხვაგვარი შეიძლება იყოს – უარესის მოსვლის შიში, სამსახურის ან ტენდერის დაკარგვის შიში, ან რწმენა, რომ სწორედ ეს პარტია იცავს ჩვენს ღირებულებებს და ტრადიციებს. მხარდაჭერის მოტივი შეიძლება იყოს გაცნობიერებული ან გაუცნობიერებელი. შეიძლება ხედავ “ოცნების” დანაშაულებს და ითმენ სხვადასხვა მიზეზით, შეიძლება ვერ ხედავ – არცოდნა რომ არცოდვაა – ისე, შეიძლება ხედავ და მოგწონს, რადგან თვლი, რომ სიმართლე მორევაზეა.

თუმცა, მოტივი არ გვათავისუფლებს პასუხისმგებლობისგან. როდესაც ძალადობა და უსამართლობა ყოველდღიურობა ხდება და ამ ყველაფერს რეჟიმი შენი სახელით სჩადის, მხარდაჭერა ნეიტრალური აღარ არის.

❓ რის მიღწევას ვცდილობთ?

ჩვენ არ და ვერ მოგახვევთ ჩვენს აზრს. არ მოგიწოდებთ, რომ რუსეთს ევროპა არჩიოთ, ან უმეგობროდ დარჩენას – მეგობრის ყოლა. არც ვინმესთან ნიშნისმოგებით საუბარია ჩვენი მიზანი.

ჩვენ არ გვგონია, რომ “ოცნების” ყველა მხარდამჭერი გააზრებულად უჭერს მხარს კრიმინალს. ზოგიერთი მათგანი ჩვენი ახლობელია, მეგობარია, ოჯახის წევრია – ადამიანები, რომლებზე უარს არ ვამბობთ.

ზუსტად ამიტომ გვინდა საუბარი. არა დასარწმუნებლად, არამედ გასაგებად – რა დგას ამ მხარდაჭერის უკან, როგორ ხედავენ ისინი საკუთარ პასუხისმგებლობას ამ ყველაფერში და სად გადის ზღვარი მათი გადმოსახედიდან.

💬 როგორ ვისაუბროთ?

თუ არ ეთანხმები ჩვენს პოზიციას და მზად ხარ გვესაუბრო, ორ გზას გთავაზობთ:

• გამოგველაპარაკე თუ დაგვინახავ ქუჩაში, პროტესტის დროს
• გამოგვეხმაურე ამ საკონტაქტო ფორმით და ვისაუბროთ ონლაინ-რეჟიმში

ჩვენ ერთხელ უკვე გვქონდა ასეთი მცდელობა, სადაც ასობით გამოხმაურება მივიღეთ, თუმცა, ძირითადად ეს იყო აგრესიული ტროლებისგან. რეალურ საუბარზე მხოლოდ რამდენიმე ადამიანი დაგვთანხმდა.

ამჯერად ველით, რომ ვიპოვით ადამიანებს, ვინც მზად არის საკუთარი პოზიცია ღიად დაიცვან.

📜 შეჯამება

ჩვენ ვთვლით, რომ “ოცნება” კრიმინალური ორგანიზაციაა და ამას ფაქტებით და არგუმენტებით ვასაბუთებთ.

შესაბამისად, ვამბობთ, რომ “ოცნების” მხარდაჭერა აღარ არის მხოლოდ პოლიტიკური გემოვნების საკითხი. მოტივის მიუხედავად, ეს არის პასუხისმგებლობის გაზიარება.

ჩვენ არ ვცდილობთ საკუთარი აზრის თავზე მოხვევას. ვეძებთ “ოცნების” მხარდამჭერებს, რათა გავიგოთ, რა დგას ამ მხარდაჭერის მიღმა და როგორ აღიქვამენ ისინი საკუთარ პასუხისმგებლობას.

თუ “ოცნებას” მართლაც ჰყავს 1.200.000 მხარდამჭერი, ვიმედოვნებთ, რომ ვიპოვით 10 ადამიანს მათ შორის, ვინც მზად იქნება ღიად და არგუმენტირებულად დაიცვას საკუთარი პოზიცია.