“ნაცების დროს უარესი იყო!”

ამ საკითხის ასე დაყენება არასწორია. სხვისი დანაშაული საკუთარს არ ამართლებს. წარსული ცოდვა კი – დღევანდელს. თუმცა, რადგან “ოცნების” პროპაგანდა სწორედ ასეთ შედარებებზე დგას, ჩავეძიოთ.

• ასევე იხილე: პროპაგანდის ტექნიკა – Whataboutism

ადრეც სვამდი ამ შეკითხვას?

სანამ ჩავეძიებით, ერთ კითხვას დაგისვამთ: “ნაციონალების” დროინდელ დარბევებსაც ასე ამართლებდი?  ამბობდი, რომ შევარდნაძის დროს მაინც სჯობს, როდესაც კრიმინალი ყვაოდა და სახელმწიფო ჩამოშლილი იყოო? ადარებდი საბჭოთა კავშირის მასობრივ რეპრესიებს?

გავიხსენოთ..

მაშინაც, როგორც დღეს, დასავლეთი გმობდა ამ ძალადობას. განსხვავებით დასავლეთისგან, დღევანდელ მაღალჩინოსნებს სხვა პოზიცია ეჭირათ:

ბიძინა ივანიშვილი აფინანსებდა რეჟიმს, “ხარება” არბევდა, მურუსიძე ასამართლებდა, კალაძე კი ამართლებდა.

“ოცნებამ” ასევე შეინარჩუნა და დააწინაურა არაერთი პოლიტიკოსი, ძალოვანი, მოსამართლე, მაგ. ისეთი საქმეების მოსამართლეები, როგორიცაა გირგვლიანის საქმე, მოლაშვილის საქმე,  თეთრაძის საქმე და სხვა.

შევადაროთ…

არასწორია აწონ-დაწონვა და ვაჭრობა, თუ რამდენი ძალადობის უფლება აქვს არსებულ რეჟიმს. თუმცა, რადგან პროპაგანდა ასეთ შედარებებზე დგას, ჩვენც შევადაროთ.

შედარებისთვის, “ოცნების” დარბეულ აქციებზე, ასეთი შედეგი დადგა:

• სპეცრაზმმა გამოიყენა: წყლის ჭავლი, ცრემლსადენი გაზი, რეზინის ტყვიები, ასევე – არაფორმალური ნიღბიანი ბანდები
• ძალადობა: დაზიანდა პროტესტის 500+ მონაწილე
• პატიმრობა: 100+ პატიმარი სისხლის სამართლის წესით
• ასევე: აქციაზე გამეტებით ცემეს არაერთი ადამიანი (იხ. ქვემოთ)

“ოცნება” უფრო მეტი რესურსით, უფრო ორგანიზებულად და მრავალფეროვნად დაუპირისპირდა მოქალაქეებს. დაპატიმრების კუთხით კი გაცილებით გადაასწრო. გარდა ამისა, ეს ხდებოდა ხანგრძლივად, დღეების განმავლობაში და პერიოდულად – 2019 წელს, 2023 წელს, 2024 წლის გაზაფხულზე, 2024 წლის ნოემბერში.

ℹ️ აქვე: იცოდი, რომ 2025 წელს, პატიმრების რაოდენობამ საქართველოში ისტორიულ მაქსიმუმს მიაღწია?

“არ მოუკლავთ მაინც…”

თუ ჩვენ ვადარებთ იმ ფაქტს, რომ დღევანდელ რეჟიმს აქციაზე ჯერ ადამიანი არ მოუკლავს, სამაგიეროდ ხომ გაიმეტა მოსაკლავად? ასეთი ცემის დროს განა ვინმეს შეუძლია აიღოს პასუხისმგებლობა, რომ ადამიანი არ მოკვდება?

ან შენ – ელოდები ასეთი ფაქტის დადგომას? მანამდე არ ღირს გაპროტესტება?

მაგალითად, აქციის მონაწილე ყვება ექიმის კომენტარს – თუ როგორ სასწაულებრივად გადარჩა, და რომ ოდნავ მეტად დაგვიანებას სავალალო შედეგი მოყვებოდა.

ფოტო თუ ვიდეო მასალა კიდევ ათობით ფაქტზე შეგიძლია ნახო აქ.

ვინ დაისაჯა?

26 მაისის საქმეზე ვანო მერაბიშვილს მიესაჯა 4 წელი და 6 თვე.

დღეს, მსგავსი ან უფრო მძიმე ძალადობის ფონზე, არავინ ისჯება — პირიქით, “ოცნება” აჯილდოვებს ძალოვანებს, აქციის მონაწილეებს კი წლობით აპატიმრებს.

“ადრე მიტინგს ვინ ჩაგატარებინებდათ..”

გვეუბნებიან, რომ მადლიერი უნდა ვიყოთ უარესს რომ არ სჩადის რეჟიმი. ასეთი შედარებები რომ არასწორია, ამაზე უკვე ვილაპარაკეთ. თუმცა, მაინც ჩავეძიოთ რამდენიმე მაგალითით:

• საკნების აქციის დროს, რუსთაველის გამზირის სავალი ნაწილი გადაკეტილი იყო კვირების განმავლობაში. შედარებისთვის, დღეს, ტროტუარზე დგომა ისჯება პატიმრობით, დიუშენის აქციაზე კი მშობლებს პუფის შეტანას უკრძალავენ.
• ხდებოდა ადმინისტრაციული შენობების აჭედვა ფიცრებით
• …პოლიციის მანქანების დაწვა და სხვა

“ნაციონალური მოძრაობის” პერიოდში ჩატარდა 90-მდე აქცია.

კახი კალაძე ამ დარბევებს ამართლებდა, შენ – ამართლებ?

“ის ჯანსაღი პროტესტი იყო..”

ზოგი ამბობს – ადრე პროტესტის მონაწილეები მართლები იყვნენ, ამიტომ არ ეკუთვნოდათ დარბევა, დღეს კი სახელმწიფოს გადატრიალება უნდოდათ და პოლიციას სხვა გზა არ დარჩაო.

ადრეც, ახლაც, საქართველოშიც და სხვა ავტოკრატიულ ქვეყნებშიც, მთავრობა ხშირად სწორედ ამ საბაბით არბევს ადამიანებს. პროტესტის მონაწილეების წარმოჩენა ხდება უცხო ქვეყნის აგენტურად, რომლის ცემა და წამება დასაშვებია. გთავაზობთ, ნაცვლად იმისა, რომ ავყვეთ ამ პროპაგანდას, შევთანხმდეთ ერთ, მარტივ დებულებაზე – მოძალადე, აგრესიული ბანდები უნდა დაისაჯონ, შემდეგ კი ვისაუბროთ არგუმენტებით და დავადგინოთ სიმართლე.

შეჯამება

სწორედ ეს დარბევები და ძალადობა იყო მთავარი მიზეზი, რატომაც მოვიდა ახალი ძალა.

დღესაც იგივეს ვხედავთ – სისტემური ძალადობა, დაუსჯელობა, უსამართლობა. ეს ყველაფერი კი ხდება იგივე ადამიანების ხელით, იგივე გამამართლებელი თუ გამამტყუნებელი პროპაგანდით. არც ის რეჟიმი სცემდა და აწამებდა მის ერთგულ მხარდამჭერებს, ისიც საპირისპირო აზრს ებრძოდა მხოლოდ. ის პრორუსს არქმევდა კრიტიკოსს, ეს – პროევროპელს.

“ხომ გადარჩნენ, არავინ მომკვდარა” – ეს არ არის სტანდარტი.

თუ ამართლებ იმას, რაც დღეს ხდება, დაფიქრდი, რას ებრძოდი ადრე? უსამართლობას თუ კონკრეტულ პოლიტიკოსებს? სამართლიანობა გსურდა თუ ძალაუფლება?

ეს კითხვები გამოგადგება საუბრის სწორად წამოსაწყებად. პირველ რიგში, გაეცანი გვერდს სრულად, დაეუფლე ძირითად ფაქტებს და არგუმენტებს. შემდეგ კი დასვი რომელიმე შეკითხვა, რომელსაც ყველაზე მეტად მოარგებ მოსაუბრეს. არ არის საჭირო ყველა შეკითხვის დასმა, უბრალოდ დაიწყე და შემდეგ ბუნებრივად გააგრძელე.

ზოგადად, ასეთი საუბრის წარსამართად სასარგებლო რჩევები შეგიძლია იხილო აქ.