ეკლესიას ებრძვით!

შენ ამბობ: არ მომწონს აქცია, მანდ მდგომი ადამიანები, რადგან თქვენ ეკლესიას ესხმით თავს.

ავტორიტარულ რეჟიმს უყვარს ასეთი ხრიკები – საკუთარი თავისა და მხარდამჭერებისთვის მორალურ პედესტალს ქმნის:

ის პატრიოტია, მორწმუნეა, სიწმინდის დამცველია. მასთან დაპირისპირებული ადამიანი კი რა გამოდის? ვინ შეიძლება ებრძოლოს ამ ყველაფერს დაფინანსებული მტრის გარდა?

ამიტომ საუბრობენ ასე ხმამაღლა ქრისტიანობაზე, სიწმინდეზე, სუვერენიტეტზე. პარალელურად კი იპარავენ, მდიდრდებიან, ძალადობენ მოყვასზე და ბოდიშს უხდიან მტერს.

რწმენის დაცვას არ სჭირდება მოძალადე რაზმების შექმნა. ქრისტიანობის დამტკიცებას არ სჭირდება სხვის გასაგონად ლოცვა.

სამთავრობო არხები მუდმივად არჩევენ პროტესტის რომელიმე მონაწილის განცხადებას თუ შემთხვევას, განაზოგადებენ, გააბუქებენ და ცილს სწამებენ მთელ პროტესტს, მასში მონაწილე ასობით ათას ადამიანს:

ხომ გეუბნებოდით?! პროტესტის მონაწილეებს სძულთ ყველაფერი ის, რაც ჩვენთვის, ნამდვილი ქართველებისთვის, ასე ძვირფასია!

ასე ცდილობს პროპაგანდა ადამიანების მომართვას პროტესტის წინააღმდეგ.

კატალოგი

ტყუილი, განზოგადებული ბრალდება და ცილისწამება რომ მორწმუნე ადამიანისთვის მისაღები საქციელი არ არის, ამის ახსნით თავს არ შეგაწყენთ.

მხოლოდ ერთ შეკითხვას დაგისვამთ:

რატომ არის შენი აღშფოთება შერჩევითი?

რატომ ისმის მუდმივად ცალმხრივი პროტესტი – აქციაზე მომხდარი კონკრეტული ინციდენტების განზოგადება და პროპაგანდის მანქანის აშენება მაშინ, როდესაც:

• დარბევის დროს ქაშუეთის ეკლესიას შეფარებული ადამიანები სპეცრაზმმა გამოათრია;
• სასულიერო პირებს პოლიციამ ახლოდან, დამიზნებით, სახეში რომ წიწაკის სპრეი შეასხა;
• სუსი მოქალაქეებს, მათ შორის სასულიერო პირებს უსმენს;
• ბიძინა ივანიშვილმა ხატები ნაძვის ხის მოსართავად რომ გამოიყენა ან პატრიარქს უპატივცემულოდ, ირონიით რომ ესაუბრება და ეხუმრება;
• ბერა ივანიშვილის ქორწილის გამო სვეტიცხოველი რომ დაკეტეს და საპატრიარქო ტახტი აიღეს;
• მიტროპოლიტი რომ განსაკუთრებულად ემადლიერება “ხარებას”;
• ოცნების მერობის კანდიდატის საარჩევნო პლაკატი ეკლესიის კარზე რომ მიაკრეს;
• სტიქაროსანი ტიტუშკები მოქალაქეებს რომ არბევენ;
• სასულიერო პირები ჟურნალისტებს რომ საქმეს ურჩევენ და ურტყამენ;
• სხვა სასულიერო პირები რომ აგინებენ და ურტყამენ ჟურნალისტებს;
• მღვდელი რომ აგინებს მაღაზიის თანამშრომელს;
• სასულიერო პირები ქურდებს რომ ადღეგრძელებენ;
• და კიდევ სხვა, და სხვა სასულიერო პირები…
• ზღუდერის წმინდა გიორგის ეკლესიის ძეგლი რომ უნებართვოდ რომ დაანგრიეს;
• ჯვრის მონასტერში რომ წყალი ჩადის და ინტერიერის ქვებს აზიანებს;
• გეგუთის სასახლე რომ მიტოვებულია;
• ტაძრის კედელზე რომ „Москва“ არის ამოკაწრული;
• ასეთ მდგომარეობაში მყოფ პატრიარქთან საარჩევნოდ რომ პოზირებენ;
• რეჟიმი რომ ლანძღავს მღვდლებს, რომლებიც მის პოლიტიკას არ ეთანხმება;
• რატომ შედგება მაღალი რანგის სასულიერო პირების ავტოპარკი ძვირფასი “ჯიპებისგან” (1, 2)? მაგალითად, სერბეთის პატრიარქი ფეხით გადაადგილდებოდა.
• მაღალი რანგის სასულიერი პირი რომ ტროტუარზე დადის ჯიპით;
• მღვდლები რომ დაუფარავ პროპაგანდას ეწევიან მთავრობის და მისი ნარატივების (1, 2);
• სვეტიცხოველშიც რომ ჩადის წყალი (1, 2) და დეპუტატის გულგრილი კომენტარი;
• AI-ით დაგენერირებულ ვიდეოზე მრევლის ბევრი წევრი კომენტარებში რომ ლოცულობს;
• საყდრისი რომ ააფეთქეს და გელათი რომ ინგრევა (1, 2), უკვე წლებია;
• პატრიარქის მიმართვას რომ აყალბებენ საკუთარი გეგმებისთვის, მისი სახელით ულოცავენ მთავრობას გამარჯვებას და მხილების შემდეგ აქრობენ;

რატომ თითქმის არასდროს ისმის პროტესტი ამაზე? ეს ხომ სისტემური დანაშაულია და გასაგებია ვის შეიძლება მოეთხოვოს პასუხი? რატომ ასამართლებ სრულიად პროტესტს აქციაზე მომხდარი კონკრეტული ინციდენტების გამო, როდესაც მეორე მხარეს დამნაშავე ცნობილია, და პროტესტი არ არსებობს?