💭 ვისაუბროთ

შენ მხარს უჭერ მმართველ პარტიას, იცავ მის პოზიციებს სოციალურ ქსელში თუ ფიზიკურ სამყაროში.

მოდი, ვისაუბროთ:

ჩვენ ვეძებთ ადამიანებს, ვინც ნამდვილად უჭერს მხარს არსებულ მთავრობას – არა ტროლებს, არა კორუფციული გარიგებების თანამზრახველებს, არა დაშანტაჟებულებს, არამედ რეალურ მხარდამჭერებს.

• ნუ შემოიფარგლები მონოლოგით, გადმოდგი ნაბიჯი და ესაუბრე საპირისპირო აზრს;
• ნუ ამოეფარები ყალბ ანგარიშებს;
• ნუ მოიმიზეზებ სხვადასხვა საბაბს საუბრის ასარიდებლად – რომ აზრი არ აქვს, რომ დაფინანსებულები ვართ, რადიკალები თუ სხვა.

თუ გჯერა შენი პოზიციის, დაიცავი, თუნდაც შენივე აუდიტორიისთვის.

---

რას განვიხილავთ?

ჩვენი პოზიცია ასეთია:

1. “ქართული ოცნება” კრიმინალური ორგანიზაციაა

შეურაცხყოფისთვის კი არ ვამბობთ ასე, არამედ ლოგიკურ, არგუმენტირებულ, ფაქტებით გაჯერებულ დასკვნას გთავაზობთ.

ამიტომ ვეჭვობთ – შეიძლება კი 1.2 მილიონი ადამიანი მხარს უჭერდეს კრიმინალურ ორგანიზაციას? თუ კი – რას ხედავენ ისეთს, რასაც ჩვენ ვერ ვხედავთ? რით ამართლებენ ამ მხარდაჭერას?

ეჭვს გვიძლიერებს ისიც, რომ რთულია ასეთი მხარდამჭერის პოვნა – როგორც კი გავცდებით ინტერნეტ სივრცეს და გავალთ გარე სამყაროში, ავტობუსის გაჩერებაზე, მეტროში, ქუჩაში, ბაზარში… საქართველო პატარა ქვეყანაა, 1.2 მილიონი ადამიანი რთული საპოვნელი არ უნდა იყოს.

მაინც რატომ ვთვლით, რომ “ქართული ოცნება” კრიმინალური ორგანიზაციაა?

“ქართული ოცნება” ცდილობს ბევრ საკითხზე ერთდროულად გვალაპარაკოს – გეოპოლიტიკაზე, ჩინეთის ინტერესებზე, “ნაციონალურ მოძრაობაზე”, სოროსზე, დიფ სთეითზე, გლობალური ომის პარტიაზე, ტრამპზე, პუტინზე, ბაიდენზე, ევროკავშირის უარყოფით მხარეებზე…

ჩვენი მიზანია არ ავყვეთ ამ ხმაურში და ვისაუბროთ ერთ, მკაფიო საკითხზე: სისტემურ ძალადობაზე და უსამართლობაზე. ყველაფერი აქედან იწყება. შეიძლება მოგწონდეთ რუსეთი, ჩინეთი ან ირანი. მაგრამ, ამაზე უნდა ვისაუბროთ და ხალხმა გამოიტანოს დასკვნა. საუბრისას კი არგუმენტმა უნდა გაიმარჯვოს და არა ძალამ. სანამ ეს პირიქით ხდება, სხვა საკითხებზე საუბარი ნაადრევია.

შეგვიძლია ვისაუბროთ ზოგად კრიმინალზე, კორუფციაზე. კორუფციაში მხილებული ადამიანის ორჯერ გაპრემიერებაზე, კორუმპირებულ მინისტრებზე, სუსის უფროსზე, რომელიც ქოლცენტრებს მფარველობს და საბავშვო ბაღებს პარავს ბიუჯეტს, მილიონერ პარლამენტარებზე, ბათუმის მერის საეჭვო ვითარებაში დაჭრაზე, მთავარი პროკურორის მიერ შეკვეთილ მკვლელობაზე, ეროვნულ ბანკზე, რომელმაც ამ პროკურორისთვის სასწრაფო წესით კანონი მიიღო და სანქციების არიდებაში დაეხმარა, და ა.შ.

მათი მოადგილეები? მათთან გარიგებული სხვა ადამიანები? “საქმეში ჩართული” ნათესავები? მეგობრები?

ამ ფაქტებს “ქართული ოცნებაც” აღარ მალავს და თვითონ უკეთ გვიყვება.

ჩვენ სხვა დანაშაულზე მოგიყვებით. “ქართული ოცნების” მხარდამჭერები ხშირად ასე ამართლებენ ხოლმე კორუფციულ დანაშაულებს – “კი, იპარავს მაგრამ არ ძალადობს მაინც”.

ჩვენ სწორედ ძალადობაზე მოგიყვებით. იმაზე, რაც პირადად გადაგვხდა, პირადად გამოვცადეთ, რაც მარტივი დასანახია და რაზე საუბარსაც “ქართული ოცნება” მუდმივად გაურბის.

სისტემური ძალადობა და დაუსჯელობა

ძალადობა ყველგან შეიძლება მოხდეს. მაგრამ, როდესაც ძალადობა არ ისჯება და მეტიც – რეგულარული, სისტემური და ორგანიზებული სახე აქვს, ეს უკვე მთავრობის დანაშაულად იქცევა. მთავრობას, რომელიც ახალისებს და აორგანიზებს დანაშაულს, შეგვიძლია ვუწოდოთ კრიმინალური მთავრობა.

პროტესტის მონაწილეებზე მასიური ძალადობა
პროტესტის ასობით მონაწილეს სცემა პოლიციამ თუ გდდ-მ. ათეულობით მათგანის ჰოსპიტალიზება გახდა საჭირო. დაუმტვრიეს სახის ძვლები, მიაყენეს მძიმე დაზიანებები სახისა და თავის არეში.

დაკავებულის და გაკავებულის სასტიკი ცემა და დამცირება
დაზიანებული მოქალაქეების უმრავლესობა ნაცემია დაკავების შემდეგ, პოლიციის მიერ, ჯგუფურად და სასტიკად. ცემის დროს უღებდნენ ვიდეოს, აგინებდნენ, აფურთხებდნენ, ართმევდნენ პირად ნივთებს, მათ შორის მობილურ ტელეფონებს.

არა ერთეული შემთხვევები, არამედ კოორდინირებული ძალადობა
აქციის მონაწილეებზე ფიზიკური თავდასხმა მხოლოდ აქციაზე არ ხდება. აქტიურ მონაწილეებს უსაფრდებიან და თავს ესხმიან სხვადასხვა ბანდები, ე.წ. “ტიტუშკები”.

რამდენიმე დასჯილი ასობით მტკიცებულების მიუხედავად
უამრავი, მკაფიო, პირდაპირი მტკიცებულების არსებობის მიუხედავად, დადგა მხოლოდ რამდენიმე ძალოვანის პასუხისმგებლობის საკითხი. 2019 წლიდან, “გავრილოვის ღამიდან” ერთი საქმეც არ გამოძიებულა. არაერთი ფაქტორი მიუთითებს იმაზე, რომ ამ საქმეების გამოძიება და კანონდამრღვევის დასჯა არ არის “ქართული ოცნების” ინტერესში, პირიქით, ეს ძალადობა ინსტრუმენტია მათ ხელში იმის გადასაფარად, რაც არგუმენტით არ აიხსნება.

→ ყველა ამ არგუმენტზე მეტი ინფორმაცია, მასალა, კონტრ-არგუმენტი, წყარო შეგიძლია ნახო აქ: გადასვლა

“ქართულმა ოცნებამ” იცის, რომ დამნაშავეების დასჯას ჯაჭვური რეაქცია შეიძლება მოყვეს – სხვა დამნაშავეებიც დასასჯელი გაუხდეს, საბოლოოდ კი საკუთარი თავის გასამართლება მოუწიოს. ამიტომ გააგრძელებს ის საუბარს ყველაფერ სხვაზე, ჩვენ კი გავაგრძელებთ საუბარს კრიმინალზე.

სწორედ ამიტომ გაურბიან ამ შეკითხვას “ქართული ოცნების” წარმომადგენლები:

მაგალითი 1:

• ჟურნალისტი: “რატომ არ არის გამოძიება დაწყებული?”
• პოლიტიკოსი: “ანუ გეებს მივცეთ ქორწინების საშუალება?”

მაგალითი 2:

• ჟურნალისტი: “რატომ არ არის ჟურნალისტებზე ძალადობის არცერთი ფაქტი გამოძიებული?”
• პოლიტიკოსი: “რაც შეეხება არასამთავრობო ორგანიზაციებს…”

რატომ ვსაუბრობთ მაინცდამაინც ამ საკითხზე?

სასაუბრო ბევრია – როგორ მოვაწყოთ ეკონომიკა? 700,000 ადამიანი რომ არ იღებდეს სოციალურ დახმარებას; განათლების სისტემა? წაკითხულის გააზრებაში 67-ე ადგილზე რომ არ ვიყოთ და ა.შ.

“ქართული ოცნებაც” არაერთ საკითხს გვთავაზობს განსახილველად – გეოპოლიტიკა, ჩინეთის ინტერესები, ტრამპის განცხადებები, ბრიუსელის ავკარგიანობა, გლობალური ომის პარტია, ლოკალური ომის პარტია, კაცი რომ კაცია, ქალი კი ქალი, დიფ სთეითი, მასონები, და ა.შ.

ჩვენ ვფიქრობთ, რომ ყველა სხვა საკითხამდე, პირველ რიგში, უნდა ვისაუბროთ სისტემურ ძალადობაზე და უსამართლობაზე. ჩვენი მიზანია გვქონდეს სასაუბრო გარემო, სადაც არგუმენტი იმარჯვებს და არა ძალა, სადაც დებატებში დამარცხებული პოლიციით თუ ტიტუშკებით არ ემუქრება მეორე მხარეს. ასეთ გარემოში სხვადასხვა მცოდნე ადამიანი ისაუბრებს, საზოგადოება კი დასკვნებს გააკეთებს – როგორც უნდა იყოს.

2. ..მისი მხარდაჭერა ვერ იქნება პოლიტიკური გემოვნების საკითხი

კრიმინალური ორგანიზაციის მხარდაჭერა, მოტივის მიუხედავად, ვერ იქნება მხოლოდ პოლიტიკური გემოვნების საკითხი.

კითხვის გაგრძელება

---

კამპანიის შესახებ

ჩვენი კამპანიის სახელია:

სად არის „ქართული ოცნების 1.200.000 მხარდამჭერი“?

“ქართული ოცნება” ამბობს, რომ მას 1.2 მილიონი მხარდამჭერი ჰყავს. ის სწორედ ამ მხარდამჭერების, “ამომრჩეველთა უმრავლესობის” სახელით საუბრობს, როდესაც იღებს რეპრესიულ კანონებს, იყენებს ძალას, აპატიმრებს მოქალაქეებს. “ასეთია დაკვეთაო” – ამბობს.

უმრავლესობის სურათის გასაძლიერებლად, “ქართული ოცნება” ასობით ათას დოლარს ხარჯავს ტელევიზიებში და სოციალურ მედიაში – კოორდინირებულ კამპანიებში, ტროლებში, ბოტებში.

ჩვენ ვამბობთ: “ქართული ოცნება” კრიმინალური ორგანიზაციაა.

ამიტომ: ვეძებთ 10 ადამიანს ამ 1.2 მილიონიდან, ვინც მზად არის დაიცვას საპირისპირო პოზიცია.

ვეძებთ 10 “რეალურ” მხარდამჭერს, ვინც არ არის “ქართულ ოცნებაზე” ფინანსურად დამოკიდებული ან არ ეშინია მისი. თუ გაგვიჭირდა 10 დამოუკიდებელი მხარდამჭერის პოვნა, არც ასეთ “დაინტერესებულ” მხარდამჭერებთან საუბარზე ვიტყვით უარს.

ბევრი ამბობს, რომ არსებულ მთავრობას რეალური, იდეოლოგიური მხარდამჭერი არც ჰყავს, ის დგას ადამიანებზე, ვინც, სხვადასხვა მიზეზით, იტანს ამ რეჟიმს და მათ სიმართლე ისედაც იციან. ჩვენ გვსურს გადავმოწმოთ ეს დაშვება – არის თუ არა ასე?

საბოლოოდ, გვინდა პასუხი გავცეთ შეკითხვას: არსებობს კი ეს 1.2 მილიონი მხარდამჭერი? და თუ არსებობს, რატომ ერიდებიან ისინი პოზიციის საჯაროდ დაცვას?

---

როგორ ვსაუბრობთ?

ჩვენი მიზანი არ არის საუბრის “მოგება”. აქ არ არის ადგილი ირონიისთვის ან აგრესიისთვის. ჩვენ არ და ვერ მოგახვევთ ჩვენს აზრს. არც ვინმესთან ნიშნისმოგებით საუბარია ჩვენი მიზანი.

ჩვენ არ გვგონია, რომ “ქართული ოცნების” ყველა მხარდამჭერი გააზრებულად უჭერს მხარს კრიმინალს. ზოგიერთი მათგანი ჩვენი ახლობელია, მეგობარია, ოჯახის წევრია – ადამიანები, რომლებზე უარს არ ვამბობთ.

ზუსტად ამიტომ გვინდა საუბარი – ერთი მხრივ ვაჩვენოთ ადამიანებს ეს მძიმე სურათი, მეორე მხრივ, თუ მათ უკვე აქვთ ეს ინფორმაცია, და მაინც გულწრფელად უჭერენ მხარს “ქართულ ოცნებას” – გავერკვეთ რა დგას ამ მხარდაჭერის მიღმა, როგორ ხედავენ ისინი საკუთარ პასუხისმგებლობას ამ ყველაფერში.

სხვა თუ არაფერი – უკეთ გვეცოდინება რა საკითხზე ვერ ვთანხმდებით, ნაცვლად იმისა, რომ პროპაგანდის კარნახით ჩამოგვიყალიბდეს წარმოდგენები ერთმანეთზე. ეს კი მომავალში შესაძლო დიალოგს შეუწყობს ხელს.

ჩვენ ერთხელ უკვე გვქონდა ასეთი მცდელობა, სადაც ასობით გამოხმაურება მივიღეთ, თუმცა, ძირითადად ეს იყო აგრესიული ტროლებისგან. რეალურ საუბარზე მხოლოდ რამდენიმე ადამიანი დაგვთანხმდა.

ამჯერად ველით, რომ ვიპოვით ადამიანებს, ვინც მზად არიან დაიცვან საკუთარი პოზიცია ღიად.

სასაუბრო პრინციპები

გიზიარებთ პრინციპებს, რომელთა დაცვაც მნიშვნელოვანია საუბრის დროს.

• ჩვენს არგუმენტაციას და მტკიცებულებებს შეგიძლია გაეცნო წინასწარ – გადასვლა.
• მოამზადე მტკიცებულებები (ფოტო, ვიდეო და სხვა), რათა საუბრის დროს შეძლო შენი მოსაზრებების ფაქტებით გამყარება.
• ვსაუბრობთ პატივისცემით, თუმცა ეს არ ნიშნავს, რომ თვალს ვხუჭავთ ტყუილზე, პროპაგანდაზე, გამრუდებულ არგუმენტებზე. შენგანაც იგივეს ველით.

საკითხს განვიხილავთ შემდეგი თანმიმდევრობით:

1. ფაქტები – გვაქვს თუ არა ერთნაირი ინფორმაცია განვითარებულ მოვლენებზე? მაგალითად ძალადობის ფაქტებზე.
2. ფაქტების შეფასება – როგორ ვაფასებთ წარმოდგენილ ფაქტებს?
3. შეთანხმება – თუ ფაქტებს ორივე მხარე ერთნაირად ვაფასებთ, არის თუ არა ეს საკმარისი რათა დავეთანხმოთ მხარის სათქმელს?

---

შეავსე ფორმა და ვისაუბროთ

თუ მზად ხარ სასაუბროდ, გთავაზობთ ონლაინ ან ფიზიკურ შეხვედრას, სადაც ამ საკითხებზე საუბარს შევძლებთ. შეხვედრა შეგვიძლია ჩავწეროთ, თუ თანახმა იქნები.

---

სასაუბრო მოსაწვევები

ასევე შეგიძლია გვირჩიო ვის შეიძლება ვესაუბროთ, ან შეამოწმო სტატუსი – ვინ გვირჩიეს და რა ეტაპზე ვართ ამ ადამიანებთან.

✉️ გვირჩიე, ვის ვესაუბროთ?

გვირჩიე ვის ვესაუბროთ

ვისთან საუბარს გვირჩევდი? *

მიუთითე სახელი.

რომელ პლატფორმაზეა? *

მიუთითე ბმული – რომელ პლატფორმაზეა ეს ადამიანი თუ ორგანიზაცია წარმოდგენილი ყველაზე აქტიურად.

რატომ იქნებოდა მასთან საუბარი საინტერესო?

რატომ თვლი, რომ მასთან საუბარი საინტერესო იქნებოდა? (შეგიძლია დააფიქსირო მისი პოზიციები, განცხადებები და სხვა)

გაგზავნა

If you are human, leave this field blank.

---

✅ საუბრის ჩანაწერები

საუბარი #1

საუბარი ირაკლი ლატარიასთან. საუბრის შემაჯამებელი პოსტი.