5000 ლარიანი ჯარიმა

თუ დაგაჯარიმეს 5000 ლარიანი ჯარიმით და თვლი, რომ უსამართლოდ შეგეხო ეს რეპრესიული კანონი, ეს ინსტრუქცია შენთვისაა.

არსებობს ფონდები, რომლებიც მზად არიან დაგეხმარონ, თუმცა ჯერ სხვა ბერკეტებია გამოსაყენებელი.

ეს ახალი კანონებია, შსს და სასამართლო, ტრენინგის ნაკლებობის ან სხვა მიზეზის გამო, ზოგჯერ ზედმიწევნით არ მიყვება ამ წესებს, ამიტომ შეიძლება შეგხვდეს ამ პროცედურიდან გადახვევის შემთხვევებიც. მთავარია იცოდე, რას შეიძლება ელოდე, ამ პროცესის ძირითადი შინაარსი.

1️⃣ როგორ შეიძლება აირიდო დაჯარიმება?

როგორ შეგიძლია შეამცირო დაჯარიმების ალბათობა? (მომზადებულია ამ პოსტის მიხედვით).

• ეცადე არ იყო მარტივად ამოსაცნობი – კეპი, ქუდი…
• პირბადე/ბალაკლავა – სახის დაფარვა აკრძალულია და ითვალისწინებს 2000 ლარიან ჯარიმას, თუმცა ზოგიერთი მოქალაქის აზრით, უფრო პრაქტიკულია, რადგან ართულებს ამოცნობას და გზის გადაკეტვის გამო 5000 ლარით დაჯარიმებას.
• განსაკუთრებით იფრთხილე გადაკეტვის მომენტში – ახალგადაკეტილ გზაზე, როდესაც ხალხი გზაზე გადმოდის, შეიძლება დაფიქსირდე ისეთ კადრში, სადაც ბევრი ადამიანი არ არის გზაზე. შეძლებისდაგვარად მოერიდე კამერებს.
• გადაიღე ზოგადი კადრები – სადაც ჩანს ხალხის რაოდენობა (სახეების გარეშე). შეიძლება ეს მტკიცებულებად გამოგადგეს, რომ შენთან ერთად კიდევ ბევრი ადამიანი იდგა იმ დროს იქ.
• შეძლებისდაგვარად იმოძრავე – არ გაჩერდე ერთ ადგილას, განსაკუთრებით გადაკეტვის შემდეგ არ დადგე პარლამენტის წინ ;
• არ დადგე კამერებთან პირისპირ – შეეცადე სახით არ იყო კამერისკენ მიბრუნებული, განსაკუთრებით განათებულ სივრცეში.

2️⃣ ამოგიცნეს – როგორ გაბარებს შსს ჯარიმის ოქმს?

თუ დაგაჯარიმეს, შსს გირეკავს და გატყობინებს ჯარიმის შესახებ. არსებობს რამდენიმე ვარიანტი:

3️⃣ გაასაჩივრე შსს-ში 10 დღის განმავლობაში

ოქმს რომ მიიღებ, 10 დღის განმავლობაში შეგიძლია მისი გასაჩივრება. თუ არ გაასაჩივრებ, ოქმის მიღების დღიდან 30 დღეში უნდა გადაიხადო ეს თანხა.

მაგალითად:

• ოქმი მიიღე 10 თებერვალს;
• გასაჩივრების ბოლო ვადა: 20 თებერვალი (თუმცა, სჯობს ზუსტად ბოლო დღეს არ დაელოდო, მაქსიმუმ 19 თებერვალს შეავსო);
• თუ არ გაასაჩივრე, გადახდის ვადა: 12 მარტი;

შემდეგ გააგზავნე საქართველოს ფოსტით ან მიიტანე შსს-ს შენობაში (გულუას 10, ორთაჭალა). ფოსტას რა დრო დასჭირდება მისატანად, ეს შენ არ გეხება – მაგალითად მე-9 დღეს რომ ჩააბარო და მათ კიდევ 3 დღე დასჭირდეთ, ეს არ ნიშნავს რომ დაწესებულ 10 დღეს გადააცილე.

ჩაბარებისას კონვერტს გადაუღე ფოტო, რომ გქონდეს დასტური თუ როგორ აბარებ/ჩაიბარა ფოსტამ ეს კონვერტი.

4️⃣ შსს განიხილავს შენს საჩივარს და გატყობინებს პასუხს

შსს რომ მიიღებს და გაეცნობა შენს საჩივარს, შეიძლება გაუჩნდეთ კითხვები. ამ კითხვების დასასმელად კიდევ ერთხელ დაგიკავშირდებიან, შეიძლება ეს მოხდეს რომელიმე “მესენჯერით” (მაგ. WhatsApp).

შენ კიდევ ერთხელ განუმარტავ შენი საჩივრის შინაარსს – რატომ თვლი, რომ არ გეკუთვნის ეს ჯარიმა.

ამ ზარის შემდეგ, შსს მალევე შეგატყობინებს პასუხს – დაგიკმაყოფილა თუ არა საჩივარი. პასუხს იგივე ფორმით – ფოსტით გამოგიგზავნის სახლში.

5️⃣ უარის შემთხვევაში გაასაჩივრე სასამართლოში

თუ შსს-მ არ დაგიკმაყოფილა საჩივარი, შეგიძლია მიმართო სასამართლოს.

ამ შემთხვევაშიც 10 დღე გაქვს გასაჩივრებისთვის.

ამ პროცესში უკვე იურისტი დაგჭირდება. არაერთი პარტია თუ სამოქალაქო ორგანიზაცია არის მზად შენს დასახმარებლად.

იურისტები დაგაკვალიანებენ, შენ კი შეეცადე მოაგროვო მტკიცებულებები, რომლებიც, შენი აზრით, დაეხმარება შენს არგუმენტებს, მაგალითად ვიდეო, სადაც ჩანს, რომ უკვე გადაკეტილ გზაზე გადახვედი. თუ შენ ან შენს მეგობრებს არ აქვს ასეთი ვიდეო, იკითხე სხვადასხვა ჯგუფში – კონკრეტულ თარიღზე და დროზე თუ აქვს ვინმეს გადაღებული კონკრეტული ტერიტორიის ვიდეო.

სასამართლოს რომ მიმართავ იურისტების დახმარებით, სხდომა უნდა დაინიშნოს მაქსიმუმ 30 დღეში.

6️⃣ როგორ მიმდინარეობს სასამართლო განხილვა?

სასამართლო განხილვის დროს მიენდე იურისტს. თუმცა, კარგი იქნება შენც აღჭურვილი იყო ცოდნით, თუ რას უნდა მიაქციო ყურადღება.

თუ ოქმის შემდგენი პოლიციელი თავად არ იმყოფებოდა აქციაზე, მხოლოდ კამერით ამოგიცნო და ასე მოამზადა ოქმი, შენი ადვოკატი სავარაუდოდ მის მოწმედ გამოძახებას მოითხოვს. ამის გამო შეიძლება სხდომა გადაიდოს, თუმცა უფრო მეტად შეძლებთ დეტალებში ჩაძიებას.

როგორ გიმტკიცებს შსს ბრალეულობას? ძირითადად, შსს-ს აქვს შენი ორი სურათი – შორი ხედით, სადაც გადაკეტვის მომენტი ან ცოტა ხალხი ჩანს, და ახლო ხედით, სადაც სხვა ადამიანები თითქმის არ ჩანან.

შორი ხედით სურათზე რთულია ხოლმე სახის გარჩევა. ამიტომ, კი – შეიძლება მათ დაამტკიცონ რომ იმ დღეს რუსთაველზე იდექი, თუმცა იყავი თუ არა იქ ზუსტად გადაკეტვის მომენტში, სანამ ჯერ კიდევ ცოტა ადამიანი იდგა, ამის დამტკიცება რთულია.

იშვიათად, შეიძლება იქ მდგომი პოლიციელის სამხრე კამერამ დაგაფიქსიროს კონკრეტულად გზის გადაკეტვის მომენტში, ეს უფრო მყარი მტკიცებულებაა.

დაუსვი რთული კითხვები მოსამართლეს

გამოიყენე შანსი – შენს იურისტთან შეთანხმებით, დაუსვი რთული კითხვები მოსამართლეს, რათა კიდევ ერთხელ გამოჩნდეს ამ კანონების აბსურდულობა:

• შეგიძლიათ მითხრათ რამდენი ადამიანი იქნებოდა საკმარისი იმ მონაკვეთის სამართლიანად გადასაკეტად, და რამდენი ადამიანი იდგა ჩემი იქ ყოფნის პერიოდში?
• თუ ეს რიცხვი პოლიციელმა უნდა შეაფასოს, როგორ მივხვდე მე, მოქალაქე რა შეფასებას აკეთებს იქვე მდგომი პოლიციელი, თუ მან ეს არ გვითხრა და არ გაგვაფრთხილა?
• თქვენ ამბობთ, რომ ტროტუარზე იყო ადგილი – ტროტუარზე სულ არის ადგილი, სიგრძეზე თუ გავყვებით ტროტუარი ხომ დაუსრულებელია? მაგალითად, შეიძლება კონკრეტულ მომენტში შეივსოს ტროტუარი, მაგრამ ხომ შეგვიძლია გადავნაწილდეთ თავისუფლების მოედნის მიმართულებით? და ასე დაუსრულებლად?

თუ უფლებას მისცემენ, შენს ახლობელს, დამსწრეს შეუძლია გადაიღოს ეს პროცესი – არაერთი ადამიანისთვის არის საინტერესო პასუხები ამ კითხვებზე.

7️⃣ თუ სასამართლომ გაგამტყუნა, მიმართე ფონდებს

ახლა, როცა უკვე ყველა სხვა ბერკეტი ამოწურე, სასამართლომაც გაგამტყუნა, 7 დღე გაქვს რომ გაარკვიო საკითხი ფონდებთან და გადაიხადო თანხა.

შეგიძლია სააპელაციოშიც სცადო გასაჩივრება, თუმცა ჯარიმის გადახდას ეს არ გადაავადებს, უბრალოდ – თუ იქ გაგამართლეს, ამ თანხას დაგიბრუნებენ. ანალოგიურად სტრასბურგის შემთხვევაშიც – ეს კიდევ უფრო ხანგრძლივი პროცესია და არც გადახდას გადაავადებს.

ახლა უკვე შეგიძლია მიმართო ფონდებს:

• თბილისის ადამიანის უფლებათა სახლი
• prosperitygeorgia.org

8️⃣ რა მოხდება, თუ ვერ გადაიხადე?

ფონდები აქტიურად ეხმარება მოქალაქეებს, თუმცა, თუ რაიმე მიზეზით ისე მოხდა, რომ ჯარიმა ვერ გადაიხადე, ამ შემთხვევაში, სახელმწიფოს აქვს უფლება გამოგართვას ჯარიმის გადასახდელად საკმარისი ფულადი, უძრავი თუ მოძრავი ქონება.

მაგალითად:

• ხელფასის ნახევრის ამოღება – თუ ხელფასი ბანკში გერიცხება, აღსრულების ბიურო მიმართავს შენს სამსახურს და დაგიკავებს ხელფასის ნახევარს მანამ, სანამ ჯარიმა სრულად არ დაიფარება.
• მოძრავი ქონების დაყადაღება – აქ იგულისხმება მსხვილი ქონებაც, მაგალითად მანქანა, და ასევე წვრილი ქონება, მაგალითად სახლში არსებული ტექნიკა, ავეჯი, ძვირფასეულობა. მნიშვნელოვანია, რომ იმ შემთხვევაშიც კი, თუ ეს სახლი შენი არ არის, უბრალოდ ჩაწერილი ხარ, მათ ამის უფლება მაინც აქვთ. სახლის მეპატრონემ უნდა დაამტკიცოს სასამართლოში, რომ ეს ნივთები მას ეკუთვნის და არა შენ.
• უძრავი ქონების დაყადაღება – ყველაზე უარეს შემთხვევაში, შენს სახელზე არსებული უძრავი ქონება დააყადაღოს, გაყიდოს აუქციონზე, აღებული თანხიდან ჯარიმა გადაიხადოს და დანარჩენი დაგიბრუნოს. აუქციონზე, როგორც წესი, საბაზრო ფასზე ნაკლებ ფასად იყიდება ქონება.

ეს ტვირთი ნაკლებად შეგეხება, თუ:

• შენს სახელზე არ არის გაფორმებული უძრავი ქონება – მაგალითად ბინა, რომელიც შენი ოჯახის წევრის სახელზეა გაფორმებული. ოჯახის წევრიც, რომელიც აქტიურად არ დადის აქციებზე. ინფორმაციისთვის, გადაფორმებას 4 დღე სჭირდება და 150 ლარი ღირს.
• ხელფასი ბანკში არ გერიცხება – ხარ თვითდასაქმებული და სხვა გზით იღებ ანაზღაურებას.
• შეგიძლია საბანკო ანგარიშების გარეშე არსებობა – თანახმა ხარ უარი თქვა საბანკო სერვისებზე და გამოიყენო ნაღდი ფული.

❗ აღსრულების ბიურო ჯარიმას ამატებს 7%-ს, ანუ 350 ლარს და 5000 ლარი გახდება 5350 ლარი.

ჯარიმას არ ემატება დამატებით საურავები – რჩება იმავე ოდენობად დროთა განმავლობაში.

ასეთი შეზღუდვები პრობლემაა, თუმცა არსებობენ ადამიანები, ვინც რამდენჯერმე დაჯარიმდა (15-20 000 ლარის ოდენობით) და ვისაც ურჩევნიათ ჰქონდეთ ყადაღა.

შეჯამება

5000 ლარიანი ჯარიმა დიდი ფინანსური პრობლემაა საქართველოს მოქალაქისთვის, თუმცა ამ პროცესში მარტო არ ხარ.

არსებობს ფონდები, რომლებიც მზად არიან დაგეხმარონ, იურისტები, რომლებიც უსასყიდლოდ გაგიწევენ მომსახურეობას. თუმცა, სანამ ფონდებს მიმართავ, ჯობს ზემოთჩამოთვლილი ბერკეტები გამოიყენო – მოვუფრთხილდეთ ერთმანეთის რესურსს.