🕶️ მთავრობის აგენტებს

მიმართვა მთავრობის აგენტებს,

📖 განმარტება: აგენტი ნიშნავს ინტერესების გამტარებელს. საქართველოს მთავრობის განმარტებით, თუ შემოსავლის 20%-ზე მეტი ერთი წყაროდან გაქვს, შენ ხდები ამ წყაროს ინტერესების გამტარებელი. ჩვენ არ ვეთანხმებით ამ განმარტებას, მაგრამ ამ მიმართვაში მთავრობის განმარტებას გამოვიყენებთ. მივმართავთ ადამიანებს, ვინც ბიუჯეტზეა დამოკიდებული.

რამდენი ადამიანი ფინანსდება ბიუჯეტიდან?

ესენი არიან ადამიანები თუ ორგანიზაციები, ვინც ბიუჯეტიდან ფინანსდებიან.

• 300 000-ზე მეტი ადამიანი, რომელიც საჯარო სექტორშია დასაქმებული
• 900 000-მდე ადამიანი, რომელიც სოციალურ შემწეობას ან/და პენსიას იღებს
• მთავრობასთან დაახლოვებული მრავალი ბიზნესი, მსხვილი ბიზნესის სრული უმეტესობა და ამ ბიზნესებში დასაქმებული ადამიანები – გამარტივებული ტენდერები, სპეციალური ლიცენზიები, ერთ ლარად გადაცემული სახელმწიფო ქონება, იაფი სესხი, კონკურენტების დაშინება.
• სუბსიდიები, სახელმწიფო გრანტები – ყურძნის თუ თხილის ჩაბარება, “აწარმოე საქართველოში” და სხვა.
• სპორტსმენები მილიონიანი ჯილდოებით
• ხელოვნების სფეროს წარმომადგენლები ყოველთვიური ხელფასით

არ ჩავეძიოთ ამ ადამიანების ოჯახის წევრებს, ვინც შეიძლება სრულად ან მნიშვნელოვნად იყვნენ დამოკიდებული ამ წყაროზე.

რომ შევაჯამოთ, მინიმუმ 1 200 000, სავარაუდოდ კი გაცილებით მეტი, 1 500 000 ადამიანამდე არის პირდაპირ დამოკიდებული ბიუჯეტზე.

რამდენი ადამიანია კერძო სექტორში?

საქართველოში 18-დან 65 წლამდე (საპენსიო ასაკი) 2 256 186 ადამიანი ცხოვრობს. აქედან 1 500 000-ს ხელფასს უხდის დანარჩენი დაახლოებით 750 000 ადამიანი, რომელიც გამოიმუშავებს თანხას დამოუკიდებლად. ასეთი ბალანსი ძალიან დიდი პრობლემაა.

წარმოიდგინეთ, რომ სამეზობლოში, კორპუსში გყავთ ამხანაგობის თავმჯდომარე, ვისაც 50 ოჯახი უხდით ანაზღაურებას, რათა საერთო პრობლემების მოგვარებაში დაგეხმაროთ. ახლა წარმოიდგინეთ, რომ ამ 50 ოჯახიდან, 15 ოჯახი უხდიდეს თანხას დანარჩენ 35-ს ამ საერთო პრობლემების მოსაგვარებლად. ეს ანომალიაა.

რას გვეუბნება ეს რიცხვები?

რათქმაუნდა, ბიუჯეტზე დამოკიდებული ადამიანების ნაწილიც ეწინააღმდეგება მთავრობას და დამოუკიდებელი ადამიანების ნაწილიც ემხრობა მას, ანუ ორივე ჯგუფში არიან სხვადასხვანაირი ადამიანები.

თუმცა, აქ მივმართავთ ადამიანებს, ვინც ემხრობა მთავრობას, ეთანხმება მის სხვადასხვა ქმედებას, მათ შორის აგენტების კანონის შემოღებას და, შესაბამისად, ეთანხმება ამ განმარტებასაც, რომლის მიხედვითაც ზემოთ ჩამოთვლილი ჯგუფები მთავრობის აგენტებად მოიაზრება.

შესაბამისად, ჩნდება შეკითხვები – როდესაც მთავრობის მხარდამჭერი ადამიანების უმრავლესობა რომელიმე ზემოთ ჩამოთვლილი გზით ბიუჯეტიდან ფინანსდება. და ეს შეკითხვა არის – ნამდვილად მოგწონთ მისი ქმედება, თუ მისგან დავალებული ხართ? დამთხვევაა, რომ ამ ადამიანების უმრავლესობას არ აქვს არცერთი შენიშვნა მთავრობასთან 12 წლის მანძილზე? არ არის დასაეჭვებელი, რომ ადმიანები მზად არიან შვილიშვილები დაიფიცონ (7:47) რათა გამარტივებულ ტენდერს საფრთხე არ შეექმნას?

საბოლოოდ, ჩნდება მთავარი შეკითხვა – ვის ემსახურება ამ ადამიანის მიერ მთავრობისადმი გამოხატული მხარდაჭერა, ქვეყანას თუ პარტიას?

ეს ხომ ყველას არ ეხება?!

რათქმუნდა, ეს განზოგადებაა და ყველა ადამიანს არ ეხება. სიტყვა “აგენტის” ამ განმარტებასაც არ ვეთანხმებით, განსხვავებით იმ ადამიანებისგან, ვინც “აგენტების კანონს” დაუჭირა მხარი.

აქციაზე საჯარო სექტორის არაერთი წარმომადგენელი დგას.

ჩვენ აქ მხოლოდ იმ დიდ ჯგუფს მივმართავთ, ვინც აქტიურად უჭერს მხარს მთავრობას. ჩვენ არ გთხოვთ პოზიციის დაფიქსირებას – ეს დიდი რისკია, მითუმეტეს ახალი კანონის ფონზე, რომლითაც თქვენი სამსახურიდან გაშვება ძალიან გამარტივდა. თუმცა, თუ თქვენ აქტიურად დაუჭერთ მთავრობას მხარს, ჩვენ შეიძლება გაგვიჩნდეს ასეთი შეკითხვები.

შეჯამება

ჩვენ არ ვფიქრობთ, რომ ბიუჯეტიდან დაფინანსებული ადამიანი მთავრობას მხოლოდ ამ მიზეზით უჭერს მხარს. თუმცა, მივმართავთ იმ ნაწილს, ვინც მთავრობისვე განმარტებით სწორედ ასეთ ადამიანად ითვლება – გთხოვთ დაფიქრდეთ თქვენივე პოზიციაზე და დააზუსტოთ – იცავთ მთავრობას თუ ქვეყანას.

ასევე, თუ სამსახურის დატოვებას გაიძულებენ, გაეცანი ამ რჩევებს.