👮 სამართალდამცავებს

მიმართვა სამართალდამცავებს,

შეიძლება ფიქრობ, რომ ჩვენი მხარეები საერთოდ სხვადასხვა სამყაროში ვართ, და ჩვენს შორის საუბარს აზრი არ აქვს, მაგრამ აქ გაჩვენებთ რომ გვესმის რაზე ფიქრობთ და რას გრძნობთ. აქვე გაგიზიარებთ ჩვენს ხედვას. იქნებ მოვახერხოთ საუბარი და გამოსავლის პოვნა.

🛣️ რუსეთისკენ მივდივართ თუ არა?

ჩვენ გაბრაზებული ვართ, რადგან გვჯერა, რომ მთავრობას საქართველო რუსეთისკენ მიჰყავს. საუბრის საშუალება რომ გვქონდეს, აგიხსნიდით თუ რატომ გვჯერა ეს. არგუმენტებით აგიხსნიდით, ლოზუნგების გარეშე. შენც შენსას გვეტყოდი. ვისაუბრებდით.

გვჯერა, რომ რუსეთი არც შენ გინდა. მაგრამ, შეიძლება ფიქრობდე, რომ ჩვენ ვფიქრობთ არასწორად. ვერ გაგიგია რატომ გვაქვს ასეთი აჟიოტაჟი ატეხილი. ან ფიქრობ, რომ ჩვენ მართლაც ომი გვინდა, ან ევროკავშირში შესვლა და საზოგადოების გარყვნაა ჩვენი მიზანი.

“აზრისა და მისი გამოხატვის თავისუფლება დაცულია. დაუშვებელია ადამიანის დევნა აზრისა და მისი გამოხატვის გამო.”

საქართველოს კონსტიტუცია, 17.1

☝️ რასაც არ უნდა ფიქრობდე, გახსოვდეს – განსხვავებულ აზრს პატივი უნდა ვცეთ. არ დაგვესხა თავს ეკიპირებით, ჯგუფურად, სისასტიკით. ეს არ შეგეფერება როგორც სამართალდამცველს, როგორც ქრისტიანს, როგორც ქართველს.

😡 გაბრაზებთ, გიმეტებთ, რთულია მოთმენა

შენ გაბრაზებული ხარ – გესვრით ქვებს და სხვა ნივთებს, გაგინებთ, გიწვევთ, გიმეტებთ, რუსებს გეძახით.

ჩვენც გაბრაზებული ვართ – სასტიკად გვარბევ ხან მიზეზით, ხანაც უმიზეზოდ, სახის ძვლებს გვილეწავ და საათების განმავლობაში სადისტურად გვცემ.

არც შენს მხარეს არის ყველა ასეთი, არც ჩვენს მხარეს.

არ აქვს მნიშვნელობა ვინ ვინ გამოიწვია და რა დოზით. დარბევას რომ იწყებ, რატომ არ გვაკავებ ისე, როგორც მორალი და კანონი გეუბნება? რატომ გაქვს ასეთი აგრესია ან რატომ აძლევ თავს უფლებას გამოავლინო ეს აგრესია? რატომ მიგყავს ათობით ადამიანი სიკვდილამდე ყოველდღე, შენი აღჭურვილობით და ნიღბიანი ჯგუფით? რატომ ულეწავ სახის ძვლებს უამრავ კაცს თუ ქალს? შეგიძლია თქვა, რომ ღირსეულად იქცევი? თანაბარ ძალას იყენებ? უდანაშაულო ადამიანებს რატომ ერჩი?

☝️ შეიძლება გარწმუნებენ, რომ ჩვენ ყველაფერს ვიმსახურებთ, რადგან ქვას გესვრით და რუსს გვეძახით. მაგრამ არც კანონი და არც მორალი თუ რელიგია ამის უფლებას არ გაძლევს. ასე ტყვეებს არ ექცევიან ომში (თუმცა, ანწუხელიძეს მოექცნენ).

🪖 ომი რომ დაიწყოს თქვენ იომებთ, ჩვენ – დავიმალებით

შეიძლება საქართველოსთვის გიომია. მადლობა ამისთვის!

შეიძლება ფიქრობდე, რომ ჩვენ, აქეთ მხარეს, ქარაფშუტა ადამიანები ვართ – ვერ ვაფასებთ იმას, რაც შენ სიცოცხლის რისკის ფასად შეგვინარჩუნე. არ ვიცით რა გვინდა, ან ვიცით – და ეს არის ევროკავშირში შესვლა ქართული ღირებულებების სანაცვლოდ. არ არის ასე. ნუ მოუსმენ მხოლოდ სამთავრობო არხებს. ვისაუბროთ, დასვი თუ რაიმე შეკითხვა გაქვს. გიპასუხებთ.

შენ ხომ გადაწყვიტე გამხდარიყავი ძალოვანი და აიღე ბრძოლის მოვალეობა. ჩვენ არ აგვიღია, მაგრამ მაინც ვიბრძვით. არ ვერიდებით მოწამვლას, დაღლას, ცემას, თვალების დათხრას, დასისხლიანებას, დასახიჩრებას.

☝️ შენი გადაწყვეტილებაა თუ როგორ მოიქცევი. მხოლოდ ერთ რამეზე დაფიქრდი – კადიროველი და ვაგნერელიც მეომარია – იბრძვის ყველგან, სადაც ფულს გადაუხდიან. იბრძვის იმიტომ, რომ უნდა სისხლი, ძალადობა, ძარცვა, ჩაგვრა.

მარტო მეომრობა არ არის საპატივსაცემო. “ხარებაც” იყო ომში, მერაბიშვილი რომ ორ გვამს უკვეთავდა. პატივს იმიტომ გცემთ, რომ შენთვის ძვირფასს – სიცოცხლეს რისკავ ქვეყნისთვის, ხალხის სიყვარულისთვის და არა იმიტომ, რომ გარეთ მტრის ხოცვა გსიამოვნებს, შიგნით მოყვარის და სახლში – ცოლ-შვილის. სამშობლოს სიყვარულს ვაფასებთ და არა იარაღის. სამართლის დაცვას გთხოვთ და არა პოლიტიკოსების.

ნუ მოგვთხოვ თავი დაგიხაროთ. ჩვენ არ ვცხოვრობთ პოლიციურ რეჟიმში – ასეთ რეჟიმებში ერთი მხარე მეორეს ეუბნება, რომ ჩვენ გიცავთ, ამიტომ ჩვენი სიტყვაა აქ მთავარიო. ჩვენ არ მოგვიცია შენთვის ასეთი მანდატი. შენც ნუ აიღებ. არც შენ გინდა თავჩახრილი, მონური საზოგადოების დაცვა.

სხვა მიზეზები

შეიძლება სხვა მიზეზით ხსნი შენს ქმედებას. ნაკლებად იდეოლოგიური, უფრო – პრაგმატული მიზეზით.

ის, რასაც ვერ გაგიგებთ

ზემოთ შევეცადეთ გაგვეგო შენი ფიქრები და გვეპასუხა ჩვენი პოზიციიდან. თუმცა, არის კიდევ ერთი საკითხი, რომელსაც ვერ გაგიგებთ.

თქვენში არის ნაწილი, რომელსაც განსაკუთრებით სიამოვნებს ადამიანების წამება – ხანგრძლივად, გამეტებით, ახალ-ახალი მეთოდებით, დამცირებით. შემდეგ კი ზემდგომის გასახარებლად სურათების გადაღება და გაგზავნა. ეს არის ბოროტის ქცევა.

ვიცით, რომ ყველა ასეთები არ ხართ, თუმცა არც ცოტანი ხართ. უმეტესობა ხართ თუ არა – ეს თქვენ უნდა გადაწყვიტოთ და გვაჩვენოთ.

და ბოლოს…

თუ მართლაც გჯერა ზემოთ ჩამოთვლილი აზრების, მოდი ვისაუბროთ. ეცადე დაივიწყო სიძულვილი, რომელსაც გინერგავენ. გვითხარი შენი აზრი, შეგვისწორე თუ რაიმე გვეშლება.

დაფიქრდი – მართლა გჯერა ამ მიზეზების თუ უბრალოდ სინდისს იმშვიდებ? საკმარისია ეგ არგუმენტები რომ ასობით მოქალაქე დაასისხლიანო? ალბათ არ არის საკმარისი, თორემ საუბარს რატომ მოერიდებოდი? ნიღბით, ჯგუფურად რატომ დაგვესხმებოდი თავს?

შეიძლება ეს არგუმენტები არ გაინტერესებს და უბრალოდ გსიამოვნებს ადამიანების ცემა. ჩვენ გვჯერა, რომ ასეთები უმეტესობაში არ ხართ. სწორად გვჯერა თუ არა – შენ უნდა გვაჩვენო.