📜 მანიფესტი

სათქმელი ბევრი გვაქვს. დროა ერთად გავავრცელოთ, მივუტანოთ თითოეულ ადამიანს, რიგ-რიგობით, დაუღალავად. გავაბათ და აღვადგინოთ ის კავშირები, რომელთა ჩატეხვასაც სისტემა ცდილობს – რათა დაგვყოს, და იბატონოს.

👉 მოგმართავთ შენ..

თუ შენ:

• აპირებ ბრძოლას უკეთესი საქართველოსთვის, რადგან არ იცი როგორ იცხოვრო უსამართლო, მოძალადე სისტემაში, როგორ დაგეგმო მომავალი, გაზარდო შვილი;
• გჯერა, რომ საუბარს აქვს აზრი – პროპაგანდით დაზიანებული ურთიერთობების აღსადგენად, აქტიური საზოგადოების ჩამოსაყალიბებლად, ძალების შესაერთებლად;
• გიჭირს გაგება, როგორ შეიძლება არ იზიარებდნენ შენი ახლობელი ადამიანები შენს ტკივილს;
• ეძებ მათთან საუბრის გზებს, ცდილობ გაარღვიო ბარიერი – პროპაგანდის და გულგრილობის ნაზავი, მაგრამ ეს რთულია;

შენ მარტო არ ხარ. ჩვენც გამოგვიცდია ეს. ასეთი საუბარი არ არის მარტივი, მაგრამ ერთად ამას შევძლებთ. თუ ჩვენ ვერ შევძლებთ, პროპაგანდა შეძლებს.

👁️ მოწინააღმდეგე ძლიერია

ბევრი რამ ართულებს ასეთ საუბრებს – მძლავრი პროპაგანდა, ინფორმაციის ნაკლებობა რეგიონებში, დაძაბული გარემო შინ თუ გარეთ, სიღარიბე, შიში ომის, სამსახურის დაკარგვის, განსხვავებული აზრის…

ბევრი რამ მოქმედებს ადამიანების განწყობაზე.

თუმცა, ჩვენი რწმენით, მთავარი მოწინააღმდეგე არის ადამიანის ბუნება – კერძოდ, შინაგანი ბრძოლა კომფორტსა და სინდისს შორის.

ყველას გვაქვს საკუთარი კომფორტი – სტაბილური გარემო, შემოსავალი, გეგმები, ჰობი. ვუფრთხილდებით ამ კომფორტს და ეს ნორმალურია. როდესაც პროტესტის გამოხატვის დრო დგება, გვიწევს ავწონ-დავწონოთ – “ღირს” პროტესტის გამოხატვა და ამ კომფორტის გარისკვა? იქნებ ისეთი არაფერი ხდება? იქნებ მედია აბუქებს?

პროპაგანდა აქტიურად მუშაობს, რომ ეს ასე გვეგონოს და ცხოვრება ჩვეულ რეჟიმში გავაგრძელოთ.

არცოდნა არცოდვააო – ნათქვამია. ჩვენ კი ყველანაირად ვცდილობთ, რომ არ ვიცოდეთ.

ასეთია ადამიანის ბუნება.

ბრძოლა კომფორტსა და სინდისს შორის.

სინდისთან ბრძოლაში მარტო არ ვართ. მძლავრი პროპაგანდა მუდმივად გვამარაგებს არგუმენტებით.

ჩვენ გვჯერა, რომ ადამიანი პროპაგანდაზე ჭკვიანია. პროპაგანდა უბრალოდ ამ ბრძოლაში ეხმარება მას. ამშვიდებს – “მართალი ხარ, არაფერი ისეთი არ ხდება, გააგრძელე შენი ცხოვრება”-ო. ადამიანი იყენებს პროპაგანდას და არა პროპაგანდა – ადამიანს.

ნუ გვაბულინგებთო რომ ამბობენ, სწორედ ამაზე სწუხან. არაკომფორტულ სიმართლეს ვაჩვენებთ. პროპაგანდით შეკოწიწებულ “სიმართლეს” ვუზიანებთ.

სწორედ ამ ადამიანებთან გვაქვს სამუშაო.

💡 როგორ დავამარცხოთ მოწინააღმდეგე?

ჩვენი მოწინააღმდეგე ადამიანი არ არის.

ჩვენი მოწინააღმდეგეა ადამიანის ბუნებრივი სურვილი – კომფორტი ამჯობინოს სიმართლეს და მძლავრი პროპაგანდა, რომელიც ამ სურვილის დაკმაყოფილებაში ეხმარება.

პროპაგანდა ნერგავს შიშს, ახალისებს აპოლიტიკურობას, და აჩუმებს სინდისის ხმას.

ადამიანის ბუნება სვამს კითხვას – “ხომ არ ჯობს გავჩუმდე?”, პროპაგანდა პასუხობს – “კი”.

ჩვენი ბრძოლაც აქ არის – ჩვენი პასუხი ამ კითხვაზე არის:

შენი გადასაწყვეტია გაჩუმდები თუ არა, მაგრამ გადაწყვეტილების მიღებამდე, ნება მომეცი გითხრა სიმართლე.

ჩვენი მიზანია ამ ბრძოლაში დავამარცხოთ პროპაგანდა და გავაძლიეროთ სინდისის ხმა.

ჩვენ ვცდილობთ ხალხში საზოგადოების გადარჩენას. სინდისის, ღირსების, თანადგომის. თუ თანადგომის არა, თანაგრძნობის მაინც – მისთვის, ჩუმად რომ განიცდიდეს ჩვენს საწუხარს. თანადგომა კი მაშინ გამოხატოს, როდესაც თვითონ იქნება მზად.

თუ ახლობელი გეუბნება, რომ მან არ იცის რას აპროტესტებ, ან არ სმენია ძალადობაზე, უსამართლობაზე, დიდი ალბათობით ის ამ ბრძოლაშია. შენთვის შეიძლება ეს წარმოუდგენელია – “როგორ შეიძლება ვინმე ვერ ხედავდეს რაც ხდება?!”, მაგრამ ნუ იფიქრებ, რომ შენ გებრძვის, ან გატყუებს, ნუ გაბრაზდები, უბრალოდ, ჯერ ეს ბარიერი არ გადაულახავს.

ესაუბრე.

შენ მათი სამყაროს ნაწილი ხარ. შენს სიტყვას ისეთი ფასი აქვს, მედიას და პოლიტიკოსს რომ ვერასდროს ექნება.

ოჯახური კავშირი, მეგობრობა, ნდობა გაცილებით ძლიერია, ვიდრე ნებისმიერი პროპაგანდა.

საუბარი აქციე ყოველდღიურობად – ნაცვლად იმისა, რომ მოერიდო ამ “უსიამოვნო” საუბრებს, ეძებე დრო და სივრცე, სადაც ამ საკითხებზე საუბარს შეძლებ შენს გარშემომყოფებთან.

რთულ საკითხებზე საუბარი არაკომფორტულია, მაგრამ ეს გვზრდის, როგორც საზოგადოებას.

თითოეული არაკომფორტული საუბარი გვიმარტივებს შემდეგ საუბარს.

თითოეული დაფიქრება, დაბადებული ეჭვი, გვიმყარებს რწმენას და არყევს რეჟიმს.

ცვლილება ერთი საუბრით არ მიიღწევა. ესაუბრე კიდევ, მოიკითხე, გაუზიარე ამბები, კითხე აზრი.

სწორედ ასე, მყარი, შეუპოვარი სვლით შეგვიძლია მივაღწიოთ სასურველ შედეგს.

✊ ერთ ადამიანთან საუბრის ძალა

ზოგი ფიქრობს, რომ საინფორმაციო ომის მოსაგებად აუცილებელია ძლიერი მედია, მასშტაბური კამპანიები, ინფლუენსერები.

კი, ეს ყველაფერი მნიშვნელოვანია, მაგრამ სისტემას ასეთი რესურსებით ვერ დავუპირისპირდებით. ერთმანეთთან საუბრით უნდა შევებრძოლოთ.

🌱 ავტორიტარული რეჟიმის ჩამოშლა მცირე ეჭვით იწყება, მეგობრებს შორის მოარული აზრით, ერთი ადამიანის გამბედაობით, რომ თუნდაც მის წრეში გააჟღეროს სათქმელი.

მასმედიას შეუძლია ბევრ ადამიანამდე მიიტანოს ინფორმაცია. შენ – მხოლოდ შენს ახლობლებთან, შენს წრესთან. თუმცა, შენი სიტყვა პატივსაცემია, ნდობა გაქვს, გისმენენ. ადამიანმა შეიძლება ტელევიზორში ან უცხოსგან გაგებულს ყურადღება არ მიაქციოს, მაგრამ მეგობრის სიტყვებს? ოჯახის წევრების წუხილს?

ასეთი ინდივიდუალური საუბარი ადამიანის დარწმუნების ყველაზე ძლიერი გზაა, რადგან ასეთი საუბრები დაფუძნებულია ნდობაზე, ემოციაზე, ურთიერთგაგებაზე.

საკმარისია დავარწმუნოთ მხოლოდ ერთი ადამიანი.

🔥 ასე მოვიგებთ – მშვიდად, თანმიმდევრულად, ფუნდამენტურად.

ჩვენ არ წარმოვადგენთ რაიმე ჯგუფს, არ გვაცვია ფორმა. ჩვენ გვაერთიანებს ჯანსაღი პოზიციები. თითოეული საუბარი ჩვენი სიმამაცის ნიშანია. თითოეული ადამიანის მოპოვებული ნდობა – სიმართლისკენ გადადგმული ნაბიჯი.

🤝 შემოგვიერთდი

თუ იზიარებ ამ ხედვას, თუ გსურს შემოგვიერთდე ამ ბრძოლაში რომ ერთად აღვადგინოთ ხიდი ახლობელ ადამიანებთან, შემოგვიერთდი.

გავხდეთ კოლექტიური სინდისი. ერთად გავარღვიოთ მოწამლული წრე.