🎯 მისია

როგორი ქვეყანა გვინდა ამაზე ვისაუბრეთ. რა არის ჩვენი როლი ასეთი ქვეყნის შენების პროცესში?

დემოკრატიის მთავარი ბირთვი არის ადამიანი – აქტიური მოქალაქე, რომელიც ქვეყნის მართვაში იღებს მონაწილეობას, ის აკონტროლებს მთავრობას. მთავრობას კი მუდმივად აქვს ცდუნება დაუსხლტეს მის კონტროლს – კონტროლი ხომ არ არის სასიამოვნო?

განვიხილეთ თუ რატომ და როგორ ებრძვის მთავრობა. როგორ იყენებს ის მასშტაბურ, კარგად ორგანიზებულ სისტემას, და როგორი დაუცველია რიგითი მოქალაქე ამ ორგანიზებული ტყუილისგან, დეზინფორმაციისგან.

ჩვენი მისიაა დავეხმაროთ აქტიურ მოქალაქეებს დემოკრატიისთვის ბრძოლაში, დეზინფორმაციისგან თავდაცვაში, შევაიარაღოთ ისინი პროპაგანდისგან გაფილტრული ინფორმაციით და მათთან ერთად შევქმნათ გარემო, სადაც სხვადასხვა პოზიციის მქონე ადამიანები ერთმანეთთან ვისაუბრებთ.

გესაუბრებით შენ – აქტიურ მოქალაქეს

აქტიურ მოქალაქეში ვგულისხმობთ მას, ვინც სამართლიანობის, დემოკრატიის დასაცავად მუდმივად მზად არის. ჩვენ გესაუბრებით შენ, შენ კი ესაუბრე ადამიანებს შენს გარშემო – ნათესავს, მეგობარს თუ თანამშრომელს.

ვესაუბროთ სხვა პოზიციაზე მყოფ ადამიანებს

ზემოთ ვახსენეთ, რომ ჩვენი ერთ-ერთი მთავარი მიზანი ისეთი გარემოს შექმნაა, სადაც სხვადასხვა პოზიციაზე მყოფი ადამიანები ერთმანეთთან საუბარს შეძლებენ. თუ პარლამენტი და მედია არ გვიწყობს ხელს, ვესაუბროთ ერთმანეთს – პირისპირ. ვესაუბროთ ნაცნობებს, ახლობლებს, მეგობრებს თუ თანამშრომლებს. ვესაუბროთ ფიზიკურ თუ ციფრულ სამყაროში.

საუბარს შეიძლება ართულებდეს ორი რამ:

1. ზოგადად, რთულია საუბარი – ამ მოწამლულ გარემოში, სადაც მთელი სისტემა მომართულია დეზინფორმაციისკენ, გარიყვა-სტიგმატიზაციისკენ, გახლეჩვა-პოლარიზაციისკენ, რთულია ნებისმიერი პოლიტიკური საკითხის განხილვა. ვერიდებით კონფლიქტს, მითუმეტეს ახლობელ ადამიანებთან.
2. ადამიანთა ნაწილი, რომელთა ინტერესშიც არ არის საუბარი – ესენი არიან ადამიანთა შედარებით მცირე ჯგუფი, რომელთაც უბრალოდ არ სურთ პროდუქტიული საუბარი. მათ იციან სიმართლე, თუმცა გამიზნულად ავრცელებენ ტყუილს, ზიზღს, ბოროტებას.

ჩავეძიოთ ამ სირთულეებს.

..ზოგადად, რთულია საუბარი

გარემო არის მოწამლული. საინფორმაციო ველი გაჯერებულია პროპაგანდით, სიძულვილით, ჩახლართული თუ პრიმიტიული ტყუილებით, ფობიებით. ადამიანები ერიდებიან ამ საკითხებზე საუბარს, განსაკუთრებით ახლობლებთან – არ სურთ კონფლიქტი, ურთიერთობის დაზიანება. საუბარს ართულებს ემოციური ფონი, პროპაგანდის მიერ ერთმანეთში ათქვეფილი სიმართლე და ტყუილი. საჭიროა ამ ყველაფრის მართვა, მათ შორის ბულინგში რომ არ დაგვდონ ბრალი. მთავრობისგან განსხვავებით, საზოგადოებას არ აქვს ერთიანი მესიჯბოქსი – ჩამოყალიბებული, თანმიმდევრული არგუმენტები გამართული აქცენტებით. ამ ყველაფრის ანალიზს ჩვენ შემოგთავაზებთ. ჩვენ შეგაიარაღებთ ამ არგუმენტებით.

რას ნიშნავს არგუმენტებით მომარაგება?

ჩვენ მოგამარაგებთ არგუმენტებით, რათა ამ ჯგუფებთან საუბარი გაგიმარტივდეს.

“კი, მაგრამ, ჩვენ ვერ ვვაზროვნებთ? რად გვინდა ეს გამზადებული არგუმენტები?” ეს კითხვა დაუსვამთ აქამდე.

საქმე იმაშია, რომ მეორე მხარეს, მთვრობა, ჩვენი გადახდილი ხელფასით ქირაობს გამოცდილ პროპაგანდისტებს და მათი შექმნილი მესიჯბოქსით გვებრძვის, წამლავს გარემოს, ამ მოწამლულ გარემოში კი გთავაზობთ აირწინაღს, ფილტრს.

ჩვენ კი – ჩვენი საქმე გვაქვს, საქმის შემდეგ კი აქციაზე ვდგავართ. როგორი მართალიც არ უნდა ვიყოთ, არ ვართ პოლიტიკოსები, იურისტები, ჟურნალისტები, არ გვაქვს დებატების, პროპაგანდის განეიტრალების გამოცდილება.

ადამიანები ითხოვენ ასეთ მასალას

რატომ ღირს ამ სირთულის გადალახვა? ჩვენ ერთად უნდა ვიცხოვროთ. როგორც ხედვაში აღვწერეთ, საჭიროა მთავრობის, პოლიტიკოსების კონტროლი. მას მთელი საზოგადოება აფინანსებს და როდესაც ის კარგავს კონტროლს, ეს მთელი საზოგადოების პრობლემაა. ურთიერთობის შესანარჩუნებლად სწორედაც საუბარია საჭირო – განსხვავებებზე თვალის დახუჭვის მაგივრად საჭიროა მათი განხილვა, გააზრება და მათ მიუხედავად ურთიერთობის გაგრძელება. ჩვენი გამოცდილებით, ადამიანთა დიდ ნაწილთან ჯანსაღ საუბარს ყოველთვის აქვს აზრი. სულ რომ ვერ შევთანხმდეთ გარკვეულ პოზიციებზე, გვეცოდინება მაინც – სად ვთანხმდებით და სად – ვერა. ეს კი პირველი ნაბიჯია საერთო გეგმების დასასახად.

როგორ გადავლახოთ ეს სირთულე? როგორც ზემოთ ვთქვით, ამ მოწამლულ გარემოში ასეთი საუბარი განსაკუთრებით რთულდება. ჩვენ შევქმენით სექცია “საუბარი”, რომელიც დაგეხმარება შეხედო ამ საკითხებს ორივე მხრიდან და არგუმენტირებულად, თანმიმდევრულად წარმართო ეს საუბარი.

ადამიანები, ვის ინტერესშიც არ არის საუბარი

არის ადამიანთა ნაწილი, რომელმაც იცის რა არის სწორი, მაგრამ გამიზნულად ირჩევს სხვა გზას – ტყუილის, ზიზღის, ბოროტების გზას. ხაზგასმით ამართლებს პოლიტიკოსების ნებისმიერ ქმედებას – იქნება ეს დაკავებული ახალგაზრდების წამება თუ პრეზიდენტის არჩევა გაურკვეველი კრიტერიუმებით. შეიძლება ამას იმიტომ აკეთებს, რომ მთავრობაზეა დამოკიდებული, ან სხვა რაიმე მიზეზი აქვს.

არ ვიჩქაროთ ადამიანების მოაზრება ამ კატეგორიაში – არ “გვემარტივებოდეს” ადამიანების გამწესება ამ კატეგორიაში. ყოველთვის ღირს საუბრის ცდა – იქნებ რაიმე ინფორმაცია აკლიათ? ან ჩვენ ვხედავთ რაიმეს სხვანაირად?

თუ მართლაც ასეთი ადამიანი აღმოჩნდა, ჩამოვხსნათ ნიღაბი – თუ დავასკვნით, რომ ის მართლაც ასეთია – უტიფრად, ბოროტი განზრახვით შემოდის ურთიერთობაში, არგუმენტებით საუბარს აზრი ეკარგება. თუმცა, ასეთი ადამიანები არიან სწორედ იმ მომწამლავი პროპაგანდის ნაწილი, ზემოთ რომ განვიხილეთ. საჭიროა მათთვის ნიღბის ჩამოხსნა – მათი არგუმენტების და მოჩვენებითი მორალური უპირატესობის აბსოლუტური განეიტრალება. არ უნდა მივცეთ საშუალება ამოეფარონ ნახევარსიმართლეებს თუ უბრალოდ ტყუილს. ჩვენი მკაფიო არგუმენტებით საყრდენი უნდა გამოვაცალოთ პროპაგანდას, მოწამლულ გარემოს. მახვილი, მკაფიო არგუმენტებით უნდა ვუპასუხოთ იმდენჯერ, რამდენჯერაც შეეცდებიან ტყუილის თქმას მანამ, სანამ მათი ნათქვამის გამართლება მათ უახლოესს მომხმრეებსაც კი გაჭირდებათ. ეს დაგვეხმარება მოწამლული გარემოს ჩამოშლაში და ასევე – დაეხმარება მათ, შეიძლება ეს იყოს ბიძგი რომ დაფიქრდნენ მათ პოზიციაზე.

მაგალითად:

ასეთი ადამიანების დამაჯერებელი ტონი, რიხი, ცინიზმი რამდენიმე რამეზე დგას:

• იმედზე, რომ ტყუილში ვერ გამოვიჭერთ
• პროპაგანდის წვრთნაზე, რომელზეც იმედი აქვს რომ სხარტ პასუხს ვერ დავუპირისპირებთ
• რაც მთავარია იმაზე, რომ საერთოდ არ უწევთ მეორე მხარესთან საუბარი – საუბრობენ თავის ტელევიზიებში, მარტო სხედან პოლიციით გარშემორტყმულ პარლამენტში და ა.შ.

საბოლოოდ, თუ ამ სამს გავანეიტრალებთ გადმოდიან აგრესიაზე, მოუწოდებენ პოლიციას დაგვარბიონ, აზიარებენ მთავრობის მომაგრებულ იარლიყებს ჩვენი დეჰუმანიზაციისთვის. სხვა სიტყვებით – როდესაც სასაუბრო ამოიწურება, ცდილობენ ადამიანებზე თავდასხმას.

ჩვენი პოზიცია

ჩვენ ვართ თანამოაზრეების გაერთიანება. ჩვენ სწორედ აქტიური მოქალაქის გადმოსახედიდან ვაკრიტიკებთ მთავრობას – დღევანდელს თუ მომავალს. მოვუწოდებთ მას უკეთ ახსნას მნიშვნელოვანი გადაწყვეტილებები და ამ გზით ვეხმარებით საზოგოდოებას შეინარჩუნოს კონტროლი მთავრობაზე, შეინარჩუნოს დემოკრატია.

ურთიერთობა პოლიტიკოსებთან – ჩვენ შევეცდებით თვითორგანიზებას, პოლიტიკოსების გარეშე. გავზრდით თამასას და ამით მოთხოვნას გავაჩენთ პრინციპულ, თანმიმდევრულ, საქმიან პოლიტიკოსებზე. ჩვენ გვინდა საზოგადოებრივი იმუნიტეტი არ იყოს დამოკიდებული ერთეულ ლიდერებზე და მათ ქარიზმაზე, არ გვსურს დაგროვებული საზოგადოებრივი ენერგია გასაფანტად მივანდოთ ცალკეულ ადამიანებს – არათანმიმდევრული მოთხვონებით, ნაადრევი ზეიმით დათესილი ნიჰილიზმით. პოლიტიკოსებიც ადამიანები არიან, ვუფასებთ მათ ინდივიდუალურ წვლილს. ჩვენს საზოგადოებრივ ენერგიას გვინდა მივცეთ ისეთი მიმართულება, რომ დაბადოს საზოგადოების შესაბამისი პოლიტიკოსები – მთავრობაში თუ ოპოზიციაში.