💬 მოსაუბრეები

თუ გარშემო გყავს საპირისპირო აზრის მქონე ადამიანები – ოჯახის წევრები, მეგობრები…

სათქმელი ბევრი გვაქვს. დროა ერთად გავავრცელოთ, მივუტანოთ თითოეულ ადამიანს, რიგ-რიგობით, დაუღალავად, მრავალჯერ. გავაბათ და აღვადგინოთ ის კავშირები, რომელთა ჩატეხვასაც სისტემა ცდილობს – რათა დაგვყოს, და იბატონოს. გამოვიმუშავოთ იმუნიტეტი, რომელიც დაგვიცავს თავსმოხვეული სიძულვილისგან.

ჩვენ გვჯერა, რომ “ახლა საუბრის დრო არის”, აქამდეც იყო და მომავალშიც იქნება. საუბრის ნაკლებობამ მოგვიყვანა აქამდე – პროპაგანდას საშუალება მივეცით მოეწამლა გარემო და გაეყო საზოგადოება. პოლიტიკოსები არ საუბრობენ, მოქალაქეები ვისაუბრებთ. ვისაუბრებთ მეგობრებთან, ნათესავებთან, თანამშრომლებთან თუ სრულიად უცხო ადამიანებთან.

რთულ საკითხებზე საუბარი არაკომფორტულია, მაგრამ ეს გვზრდის, როგორც საზოგადოებას. ამ პროცესში მუდმივად ვვითარდებით და ვხვეწთ მესიჯებს. ყოველი შემდეგი საუბარი უფრო შედეგიანი იქნება. გავუზიარებთ ერთმანეთს შთაბეჭდილებებს, იდეებს, აზრებს.

პროპაგანდა გირჩევს, რომ არ ესაუბრო ახლობელ ადამიანებს “ასეთ საკითხებზე”, რომ გამიჯნო პოლიტიკა და მეგობრობა. ასეთი საუბრები არ არის მარტივი, მაგრამ ერთად ამას შევძლებთ. თუ ჩვენ ვერ შევძლებთ, პროპაგანდა შეძლებს.

✊ ერთ ადამიანთან საუბრის ძალა

ზოგი ფიქრობს, რომ საინფორმაციო ომის მოსაგებად აუცილებელია ძლიერი მედია, მასშტაბური კამპანიები, ინფლუენსერები.

კი, ეს ყველაფერი მნიშვნელოვანია, მაგრამ რეჟიმის მასშტაბებს მხოლოდ ასეთი რესურსებით ვერ დავუპირისპირდებით. ერთმანეთთან საუბრით უნდა შევებრძოლოთ.

🌱 ავტორიტარული რეჟიმის ჩამოშლა მცირე ეჭვით იწყება, მეგობრებს შორის მოარული აზრით, ერთი ადამიანის გამბედაობით, რომ თუნდაც მის წრეში გააჟღეროს სათქმელი.

მასმედიას შეუძლია ბევრ ადამიანამდე მიიტანოს ინფორმაცია. შენ – მხოლოდ შენს ახლობლებთან, შენს წრესთან. თუმცა, შენი სიტყვა პატივსაცემია, ნდობა გაქვს, გისმენენ. ადამიანმა შეიძლება ტელევიზორში ან უცხოსგან გაგებულს ყურადღება არ მიაქციოს, მაგრამ მეგობრის სიტყვებს? ოჯახის წევრების წუხილს?

ასეთი ინდივიდუალური საუბარი ადამიანის დარწმუნების ყველაზე ძლიერი გზაა, რადგან ასეთი საუბრები დაფუძნებულია ნდობაზე, ემოციაზე, ურთიერთგაგებაზე.

შენ მათი სამყაროს ნაწილი ხარ. შენს სიტყვას ისეთი ფასი აქვს, მედიას და პოლიტიკოსს რომ ვერასდროს ექნება.

საკმარისია დავარწმუნოთ მხოლოდ ერთი ადამიანი.

1️⃣ შეიარაღდი ინფორმაციით

სათქმელი ბევრი გვაქვს, საჭიროა ამ სათქმელის სწორი თანმიმდევრობით და “პორციებად” მიტანა. პროპაგანდით მოწამლულ გარემოში ბევრ წინაღობას შეხვდები, ბევრ ტყუილთან დაპირისპირება მოგიწევს, ბევრი უცნაური კონტრ-არგუმენტის განეიტრალება დაგჭირდება.

როგორი მასალაა ეს?

დაძაბულ გარემოში შენ არ გაქვს ფუფუნება დაუშვა შეცდომები, დაგაკლდეს ფაქტები, ვერ მოიშველიო წყარო. არ აქვს მნიშვნელობა ჟურნალისტი ხარ და რესპოდენტს ესაუბრები, თუ უბრალოდ მეგობართან კამათობ.

გვსურს შევაიარაღოთ კრიტიკული საზოგადოება ხარისხიანი არგუმენტებით. ეს ნიშნავს პროპაგანდის ანალიზს, კომპლექსური საკითხების გამარტივებას შესაბამისი ფორმით მიწოდებას.

მაგალითი: დაპირისპირება მამა შალვასთან (ამ ვიდეოს დიდი გამოხმაურება მოჰყვა სამთავრობო არხებზე – თუ როგორ ვებრძვით ეკლესიას), ან მკაფიო, არგუმენტირებული პასუხები პროპაგანდის კითხვებზე თუ შენიშვნებზე.

შეგიძლია წარმოიდგინო – კრიტიკულად მოაზროვნე ადამიანების გამოთქმული აზრების საუკეთესო ნაზავი – საუკეთესო არგუმენტები, გამართული თანმიმდევრობით და თანდართული წყაროებით, ერთგვარი “სუპერპოსტი”.

მოთხოვნა ასეთ კონტენტზე:

“კი, მაგრამ, ჩვენ ვერ ვაზროვნებთ? რად გვინდა ეს გამზადებული არგუმენტები?” საქმე იმაშია, რომ მეორე მხარეს, მთვრობა, ჩვენი გადახდილი ხელფასით ქირაობს გამოცდილ პროპაგანდისტებს და მათი შექმნილი მესიჯბოქსით გვებრძვის, წამლავს გარემოს. ამ მოწამლულ გარემოში კი ჩვენ გთავაზობთ აირწინაღს, ფილტრს. როგორი მართალიც არ უნდა ვიყოთ, არ ვართ პოლიტიკოსები, იურისტები, ჟურნალისტები, არ გვაქვს დებატების, პროპაგანდის განეიტრალების გამოცდილება.

ამიტომ, გაეცანი და დაეუფლე მასალას – ჩვენს სათქმელს და ჩვენს პასუხებს პროპაგანდის კითხვებზე თუ შენიშვნებზე. წყაროებს, რიცხვებს, კონტრარგუმენტებს.

2️⃣ იპოვე და ესაუბრე ადამიანებს

იპოვე ადამიანი, ვისაც ესაუბრები – ოჯახის წევრები, მეგობრები, მეზობლები, თანამშრომლები, ნათესავები რეგიონებში, თუ ინტერნეტ-აუდიტორია.

ამ ადამიანებთან საუბარს ვერიდებით ხოლმე – არ არის მარტივი, უხერხულია, ემოციურია. პირველი ნაბიჯის გადადგმაა მთავარი. კითხვის დასმა, ფიქრის გაზიარება, საუბრის წამოწყება, გაბედვა. საუბრის შემდეგ მადლიერი იქნები შენი გამბედაობის.

საუბარი აქციე ყოველდღიურობად – ნაცვლად იმისა, რომ მოერიდო ამ “უსიამოვნო” საუბრებს, ეძებე დრო და სივრცე, სადაც ამ საკითხებზე საუბარს შეძლებ შენს გარშემომყოფებთან.

ასევე, საჭიროა სათქმელის სწორად გაზიარება – საუბრის სწორად, თანმიმდევრულად წარმართვა. ჩვენ გაგიზიარებთ რჩევებს თუ როგორ უნდა დაგეგმო საუბარი და მიიტანო სათქმელი ამ ადამიანთან. გაეცანი სასაუბრო რჩევებს.

3️⃣ გაგვიზიარე შთაბეჭდილებები

როგორი მომზადებულიც არ უნდა იყო, საუბარი შეიძლება ისე არ განვითარდეს, როგორც ელოდებოდი. დაგერღვეს სტრუქტურა, ან შეგხვდეს მეტი ემოცია, დაძაბულობა.

ჩვენი მიზანია ყოველი შემდეგი საუბარი იყოს უკეთესი. ამისთვის, მუდმივ რეჟიმში ვავითარებთ მასალას და სასაუბრო რჩევებს.

გაგვიზიარე, რამ იმუშავა? რა პრობლემა შეგექმნა? რომელი არგუმენტი უნდა დავხვეწოთ ან დავამატოთ?

ასე ჩვენ ერთად ჩამოვაყალიბებთ კოლექტიურ ცოდნას, თითოეულ არგუმენტს გავაუმჯობესებთ მუდმივ რეჟიმში, სანამ არ ვსრულყოფთ.

შემოგვიერთდი

ეს ყველაფერი დამოუკიდებლად შეგიძლია გააკეთო – გაეცნო ჩვენს საიტზე მოცემულ არგუმენტებს, რჩევებს და ესაუბრო ადამიანებს შენს გარშემო.

თუმცა, თუ გსურს მოისმინო სხვა ადამიანების გამოცდილებები, გაუზიარო შენი და გავაძლიეროთ ერთმანეთი, შემოგვიერთდი ჯგუფში.

ადამიანებთან საუბარი პროპაგანდასთან ბრძოლის წინა ხაზია. ეს რთული და დამღლელია. ჩვენ, ამ პროცესში, ვაძლიერებთ ერთმანეთს მორალურად და ტექნიკურად.

• მორალურად – ზოგჯერ, შეიძლება დაღლილობამ, ნიჰილიზმა, ბრაზმა იმძლავროს. როგორ შეიძლება ასე ფიქრობდეს და ამას ამართლებდეს ჩვენი მეგობარი თუ ოჯახის წევრი?! საერთოდ, აქვს აზრი ამ საუბრებს?! ჯგუფში ერთმანეთს ვუზიარებთ ამ ემოციებს, შეგრძნებებს და ვეხმარებით ერთმანეთს მათ მართვაში.
• ტექნიკურად – ვაყალიბებთ კონტრარგუმენტებს, ვაზიარებთ გამოცდილებებს, განვიხილავთ საუბრის მართვის ტექნიკებს, გვაქვს რეგულარული ინტერაქტივები. ყოველი შემდეგი საუბარი უფრო შედეგიანია.