📄 საიტის შესახებ

საიტი შეიქმნა ერთი მიზნით: მარტივად მოუყაროს თავი სხვადასხვა არგუმენტს და დაეხმაროს საზოგადოებას არგუმენტირებულ პროტესტში.

2024 წლის გაზაფხულზე, მთავრობის მიერ მეორედ ინიცირებულმა აგენტების კანონმა დიდი პროტესტი გამოიწვია. ეს საიტიც ამ პერიოდში შევქმენით. გვქონდა ერთი მიზანი – შეგვეგროვებინა ხარისხიანი ინფორმაცია და მარტივი ფორმით მიგვეწოდებინა მოქალაქეებისთვის, და ამით დავხმარებოდით მათ ორგანიზებულ პროტესტში.

რამდენიმე კვირაში, საიტი წაიკითხა 40,000-მდე ადამიანმა. ამან კი გვიბიძგა რომ დაგვემატებინა მეტი ინფორმაცია, ასეთივე მარტივი ფორმით. გთავაზობთ ახალ სექციას: “არჩევნები 2024”. მომავალში, შემოგთავაზებთ მსგავს სექციებს სხვადასხვა აქტუალურ საკითხზე.

ამისთვის ხომ პარლამენტი და მედიაა?

პარლამენტში, სამწუხაროდ, არ არის შინაარსიანი საუბრის გარემო. არის ხმაური, დაპირისპირება, რეგლამენტის გამოყენებით კითხვების შეზღუდვა. არის “პროცედურული” განხილვა, და არა “რეალური” განხილვა.

მედიაში, მოწინააღმდეგე მხარეები არ ხვდებიან ერთმანეთს, არ იმართდება დებატები. მოქალაქეებს არ გვეძლება საშუალება მოვუსმინოთ მხარეებს და გადავწყვიტოთ – ვის უფრო ვენდობით, ვის შეიძლება მივცეთ ხმა.

რას ნიშნავს “რეალური” განხილვა?

ერთია მიყვე რეგლამენტს, მეორე – გინდოდეს და რეალურად განიხილო საკითხი. როდესაც მხარეების მიზანი არ არის საუბარი, ამას რეგლამენტი ვერ უზრუნველყოფს. პირიქით – ის იარაღიც ხდება მომხსენებლის ხელში – მიკროფონის გათიშვა, დარბაზიდან გაძევება და სხვა.

ემოციურ, დაძაბულ, შეურაცხყოფებით და წამოძახებებით გაჯერებულ ფონზე, მხარეები სვამენ შეკითხვებს და ცდილობენ მიიღონ პასუხები. მომხსენებლები, თავის მხრივ აგროვებენ შეკითხვებს, ზოგჯერ რამდენიმე ათეულსაც კი (რომლის ჩანიშვნაც კი არ ხდება), და პასუხის გაცემისას გამოტოვებენ კონკრეტულ შეკითხვას, სურვილის მიხედვით, ან უბრალოდ ზედაპირული პასუხით შემოიფარგლებიან. ზედაპირული პასუხების გარდა, არის ცინიკური და შეურაცმხყოფელი პასუხებიც, როგორიცაა “თქვენ ეს კითხვა დაგიწერეს” ან “ამაზე პასუხი თქვენ თვითონაც იცით” (როდესაც, კითხვა შეიძლება საზოგადოებისთვის ისმებოდეს).

სხვა სიტყვებით რომ ვთქვათ – ნაცვლად დინამიური, შინაარსიანი, ენერგიული დისკუსიისა, ვღებულობთ აბსოლუტურად უხარისხო, ნეგატიურ კომუნიკაციას – შეკითხვების შეგროვება და შემდეგ ნაწილობრივი და ზედაპირული პასუხები დაძაბულ და ნეგატიურ ფონზე.

როგორ იქცევა ეს მოქალაქის პრობლემად?

როდესაც ეს სისტემა არ მუშაობს, მოქალაქეს უწევს თვითონ გაერკვეს კანონებში, წაიკითხოს კანონპროექტი, დაკავშირებული სტატიები, უცხოური ალტერნატივები. ამის დრო და ენერგია, ბუნებრივია ხშირად არ არის. მხოლოდ 2023 წელს 600+ კანონი მიიღო პარლამენტმა.

მეორეს მხრივ, სოციალური მედიის ეპოქაში, თითქოს ძალიან გამარტივებული უნდა იყოს ინფორმაციის მიღება. თუმცა, ერთმანეთთან დაპირისპირებული პროპაგანდისტული არხების საინფორმაციო ნიაღვარში რთულია გაარჩიო რომელია ხარისხიანი ინფორმაცია და თავი მოუაყორ ამ გაბნეულ საინფორმაციო ნაწყვეტებს.

როგორ ეხმარება ეს საიტი ამ პრობლემას?

მნიშვნელოვან, პოპულარულ საკითხებს განვიხილავთ და დავდებთ გამარტივებული სახით, შეგროვებული არგუმენტებით და პრობლემების ანალიზით. ამ გზით, ვეცდებით შევავსოთ ის დანაკლისი რაც ზემოთ აღვწერეთ და მოქალაქეს მივაწოდოთ ის ინფორმაცია, რაც პარლამენტიდან და მედიიდან ნაკლებად, უხარისხოდ მოდის.

ჩვენი ფორმატი

ამ საიტზე მოწოდებული ინფორმაცია რამდენიმე პრინციპს ეყრდნობა:

• ჯანსაღი პროტესტი – ჩვენი მიზანია ჯანსაღი პროტესტი, ოპონირება. მნიშვნელოვანი საკითხები მარტივი ფორმით მოწოდება. ჯანსაღ პროტესტში ვგულისხმობთ არგუმენტირებულ, საგნობრივ პროტესტს. ეს არ არის არც ნეიტრალური ანალიტიკა, და არც – რადიკალური პროპაგანდა.
• მარტივი, შემაჯამებელი ინფორმაცია და არა დეტალური ანალიტიკა – ჩვენ ვცდილობთ დავსვათ ის შეკითხვები და შევაჯამოთ ის არგუმენტები, რომელზე პასუხიც ჯერ არ გაცემულა. ზოგჯერ, გთავაზობთ უფრო მეტსაც, მაგალითად, გავრცელებული მითი, რომ თითქოს აგენტების კანონი ამერიკული კანონის ანალოგია შედარებით უფრო ვრცლად შემოგთავაზეთ. თუმცა, ძირითადად ვცდილობთ დავსვათ შეკითხვები და გაგიზიაროთ ძირითადი არგუმენტები.
• სანდოობა და ინფორმაციის გადამოწმება – ჩვენ არ გთხოვთ ენდო ჩვენს ინფორმაციას. მაქსიმალურად შევეცდებით, ყველა არგუმენტის თუ ინფორმაციის გადამოწმება ძალიან მარტივად, ერთი კლიკით შეიძლებოდეს. მაგალითად, როდესაც “აგენტების კანონპროექტის” რომელიმე პრობლემაზე ვსაუბრობთ, ვუთითებთ კანონპროექტის კონკრეტულ მუხლს, ამ მუხლის გამარტივებულ ჩანაწერთან ერთად კი იქვე გთავაზობთ ორიგინალ ჩანაწერს. საბოლოოდ, ჩვენი მიზანია მოგაწოდოთ ინფორმაცია მარტივად, თუმცა არ დავკარგოთ საშუალება პირველწყაროზე, ორიგინალ ინფორმაციაზე მარტივად გასვლის.
• მუდმივად გაუმჯობესება, ღიაობა – საიტზე ყველა გვერდი ღიაა კომენტარებისთვის, შეგიძლია გააზიარო შენი აზრი – თუ არგუმენტირებული შენიშვნა გაქვს, გავითვალისწინებთ. ასევე შეგიძლია მოითხოვო ზარი და ვისაუბროთ.
• გაზიარებადი – ინფორმაცია დაშლილია კონკრეტულ საკითხებად. შეგიძლია გააზიარო კონკრეტული გვერდი.

რას ნიშნავს გაანათე?

ამ ინფორმაციის ორომტრიალში, საიტის მიზანია ნათლად შეაჯამოს არგუმენტები და დაეხმაროს მკითხველს არგუმენტირებულ პროტესტში, გაანათოს აურზაური სიცხადით და სიმარტივით.

(ზოგიერთმა მკითხველმა სახელი წაიკითხა როგორც “გაანათლე” – დავაზუსტებთ, ჩვენ არ ვაქვს პრეტენზია რომ საზოდაოების ნაწილი უნდა განვანათლოთ. მხოლოდ – დროს გიზოგავთ, ვაგროვებთ საჭირო ინფორმაციას ერთ ადგილას, ვაძლევთ ლოგიკურ და მარტივ ფორმას).

ვინ ვართ და ვინ გვაფინანსებს?

ჩვენ არ ვართ ორგანიზაცია (არც NGO, არც კომერციული, არც მედია). საიტის იდეა არის ის, რომ შევძლოთ არგუმენტებით საუბარი, ნაცვლად ადამიანებზე თავდასხმის (განვიხილოთ აზრები და არა აზრის ავტორი).

ამ ეტაპზე, საიტის ხარჯები შეადგენს რამდენიმე ასეულ ლარს (მისამართი, ჰოსტინგი, Facebook რეკლამა) და ჩვენს დათმობილ დროს.