📄 საიტის შესახებ

საიტი შეიქმნა ერთი მიზნით: მარტივად მოუყაროს თავი სხვადასხვა არგუმენტს და დაეხმაროს საზოგადოებას არგუმენტირებულ პროტესტში.

ამისთვის ხომ პარლამენტი და მედიაა?

პარლამენტში, სამწუხაროდ, არ არის შინაარსიანი საუბრის გარემო. არის ხმაური, დაპირისპირება, რეგლამენტის გამოყენებით კითხვების შეზღუდვა. არის “პროცედურული” განხილვა, და არა “რეალური” განხილვა.

რას ნიშნავს “რეალური” განხილვა?

ერთია მიყვე რეგლამენტს, მეორე – გინდოდეს და რეალურად განიხილო საკითხი. როდესაც მხარეების მიზანი არ არის საუბარი, ამას რეგლამენტი ვერ უზრუნველყოფს. პირიქით – ის იარაღიც ხდება მომხსენებლის ხელში – მიკროფონის გათიშვა, დარბაზიდან გაძევება და სხვა.

ემოციურ, დაძაბულ, შეურაცხყოფებით და წამოძახებებით გაჯერებულ ფონზე, მხარეები სვამენ შეკითხვებს და ცდილობენ მიიღონ პასუხები. მომხსენებლები, თავის მხრივ აგროვებენ შეკითხვებს, ზოგჯერ რამდენიმე ათეულსაც კი (რომლის ჩანიშვნაც კი არ ხდება), და პასუხის გაცემისას გამოტოვებენ კონკრეტულ შეკითხვას, სურვილის მიხედვით, ან უბრალოდ ზედაპირული პასუხით შემოიფარგლებიან. ზედაპირული პასუხების გარდა, არის ცინიკური და შეურაცმხყოფელი პასუხებიც, როგორიცაა “თქვენ ეს კითხვა დაგიწერეს” ან “ამაზე პასუხი თქვენ თვითონაც იცით” (როდესაც, კითხვა შეიძლება საზოგადოებისთვის ისმებოდეს).

სხვა სიტყვებით რომ ვთქვათ – ნაცვლად დინამიური, შინაარსიანი, ენერგიული დისკუსიისა, ვღებულობთ აბსოლუტურად უხარისხო, ნეგატიურ კომუნიკაციას – შეკითხვების შეგროვება და შემდეგ ნაწილობრივი და ზედაპირული პასუხები დაძაბულ და ნეგატიურ ფონზე.

მედიაში, მოწინააღმდეგე მხარეები არ ხვდებიან ერთმანეთს – არის სამთავრობო და ოპოზიციური ტელევიზიები.

რა უწევს მოქალაქეს?

როდესაც ეს სისტემა არ მუშაობს, მოქალაქეს უწევს თვითონ გაერკვეს კანონებში, წაიკითხოს კანონპროექტი, დაკავშირებული სტატიები, უცხოური ალტერნატივები. ამის დრო და ენერგია, ბუნებრივია ხშირად არ არის. მხოლოდ 2023 წელს 600+ კანონი მიიღო პარლამენტმა.

როგორ ეხმარება ეს საიტი ამ პრობლემას?

მნიშვნელოვან, პოპულარულ კანონპროექტებს დავდებთ გამარტივებული სახით, შეგროვებული არგუმენტებით და პრობლემებით. ამ გზით, ვეცდებით შევავსოთ ის დანაკლისი რაც ზემოთ აღვწერეთ და მოქალაქეს მივაწოდოთ ის ინფორმაცია, რაც პარლამენტიდან და მედიიდან ნაკლებად, უხარისხოდ მოდის.

რას ნიშნავს გაანათე?

ამ ინფორმაციის ორომტრიალში, საიტის მიზანია ნათლად შეაჯამოს არგუმენტები და დაეხმაროს მკითხველს არგუმენტირებულ პროტესტში, გაანათოს აურზაური სიცხადით და სიმარტივით.

რატომ უნდა გენდოთ?

ყველა აქ გამოთქმულ მოსაზრებას თუ არგუმენტს, მაქსიმალურად ვუკავშირებთ კანონპროექტის კონკრეტულ პუნქტს ან გარე წყაროს. ჩვენი მიზანია 1 კლიკი გაშორებდეთ ნებისმიერი ამ ინფორმაციის გადამოწმებისგან.

თუ რაიმეს არ ეთანხმებით, გაგვიზიარე კომენტარი და შესაბამისად ჩავასწორებთ.

რატომ ქვია საიტს “აგენტების კანონი”?

ეს საიტი არის კანონპროექტის პრობლემების შესახებ, საპროტესტოდ. მიუხედავად იმისა, რომ “აგენტი” 2023 წელთან შედარებით ჩანაცვლდა “ინტერესების გამტარებლით” (რაც აგენტის განმარტებაა), ჩვენ დავტოვეთ ეს სახელი.

საიტის მიზანი ინფორმაციის გავრცელება და კომუნიკაციაა, ამ ნაწილში კი გავრცელებული პრაქტიკაა კანონის მოკლე სახელით / Nickname-ით მოხსენიება. მაგალითად, სამთავრობო არხები კანონს მოიხსენიებენ “გამჭვირვალობის კანონად”, რაც ასევე არ არის ოფიციალური სათაური, მაგრამ ეს მათი არჩეული მოკლე სახელია კანონის სიკეთეზე მისანიშნებლად. ჩვენს არჩეულ სახელში კი კანონის პრობლემაზე მივანიშნებთ.

ოფიციალური სათაური მითითებულია კანონპროექტის გვერდზე.

ვინ ვართ და ვინ გვაფინანსებს?

ჩვენ არ ვართ ორგანიზაცია (არც NGO, არც კომერციული, არც მედია). საიტის იდეა არის ის, რომ შევძლოთ არგუმენტებით საუბარი, ნაცვლად ადამიანებზე თავდასხმის (განვიხილოთ აზრები და არა აზრის ავტორი).

ამ ეტაპზე, საიტის ხარჯები შეადგენს დაახლოებით $150-ს (მისამართი, ჰოსტინგი, Facebook რეკლამა) და ჩვენს დათმობილ დროს.