🗣️ გამოლაპარაკება

ზოგჯერ, საპირისპირო აზრზე მყოფ ადამიანებთან ჩვენ კი არ ვიწყებთ საუბარს, არამედ – ისინი იწყებენ ან მათ ვეპასუხებით. მაგალითად, ეს შეიძლება იყოს რეჟიმის მხარდამჭერი, რომელიც მარშის დროს გამოგველაპარაკება, ან პატიმრების გაზეთების დარიგებისას გააკეთებს კომენტარს, ან უბრალოდ ავტობუსში იტყვის ისეთ რამეს, რისი უპასუხოდ დატოვებაც არ გვინდა.

ასეთ ინტერაქციას დავარქვათ “გამოლაპარაკება” – სათქმელის თქმა ყვირილის, ხმაურის და აგრესიის გარეშე, მაგრამ მკაფიოდ და თანმიმდევრულად.

🧨 დავამსხვრიოთ უმრავლესობის ილუზია

რეჟიმის პროპაგანდა ცდილობს შეინარჩუნოს ილუზია, რომ მის მხარეს არის გარკვეული არგუმენტები თუ მორალი და, რაც მთავარია, ძალისმიერი სიმართლე – რიცხვებში გამოხატული, 1.200.000 გულმხურვალე მხარდამჭერით, ტროლებით და ბოტებით.

რეჟიმის მხარდამჭერების ნაწილს მართლაც სჯერა ამის, რადგან მათ არასდროს უწევთ საპირისპირო აზრთან შეხება – უსმენენ ერთმანეთს და საკუთარ ტელევიზიებს.

ჩვენი მიზანია დავამსხვრიოთ ეს ილუზია – გავიდეთ გარეთ, რეალურ სამყაროში, გავცდეთ ონლაინ სივრცეს და “ბაბლის ეფექტს”, ვიპოვოთ რეჟიმის 1.200.000 მხარდამჭერი და დავუსვათ შეკითხვები.

ასე, საინფორმაციო ომის მოედანს გადავიტანთ იქ, სადაც ძლიერები ვართ – რეალურ, ფიზიკურ სამყაროში.

🗣️ სად და როგორ გამოველაპარაკოთ რეჟიმის მხარდამჭერებს?

გამოლაპარაკებას არ სჭირდება მომზადება. ზოგჯერ, შეიძლება საწინააღმდეგო აზრზე მყოფმა ადამიანმა თვითონ წამოიწყოს საუბარი, ჩვენი მოწვევის გარეშე. მაგალითად, როდესაც მარშით ვითხოვთ პოლიტპატიმრების გამოშვებას. ზოგჯერ, შეიძლება თავშეყრის ადგილას, მაგალითად სუფრაზე გააჟღეროს რაიმე ისეთი, რისი უპასუხოდ დატოვებაც არ გვინდა.

ჩვენ ნებისმიერ დროს მზად ვართ დავიცვათ სიმართლე.

თუმცა, ისიც ფაქტია, რომ ხშირად რთულია რეჟიმის ნამდვილი მხარდამჭერის პოვნა. ისეთის მაინც, ვინც ან ბიუჯეტზე არ არის დამოკიდებული, ან მეთადონის პროგრამაში არ არის ჩართული, ან კორუფციულ გარიგებებში არ არის რეჟიმთან შესული.

ამიტომ, ჩვენ ვიღებთ ინიციატივას და ვიწვევთ მათ სასაუბროდ.

🪝 როგორ ვიწვევთ მათ სასაუბროდ?

სასაუბროდ გამოსაწვევად არაერთი გზა არსებობს, მაგრამ პრინციპი ერთია – ვაჟღერებთ რომელიმე სიმართლეს, რომელსაც, სავარაუდოდ, რეჟიმის მხარდამჭერი არ ეთანხმება. ვაჟღერებთ ბანერებით, საყვირით, ფლაერების დარიგებით ან სხვა გზით.

აქ გაგიზიარებთ ჩვენს მიმდინარე მაგალითს – კამპანიის, რომელზეც ვმუშაობთ. ეს მაგალითი აჩვენებს, როგორია კონკრეტული “განაცხადი”, რომლითაც საწინააღმდეგო აზრის მქონე ადამიანებს სასაუბროდ ვიწვევთ – მკაფიო, საკმარისად პროვოკაციული, გამომწვევი, თუმცა არა ზედმეტად.

შეგიძლია ეს კამპანია გამოიყენო მაგალითად და შექმნა შენი ალტერნატივა.

🎯 რის მიღწევას ვცდილობთ?

ჩვენ გვსურს გავჟღინთოთ სოციალური მედია ასეთი გამოლაპარაკებების ამსახველი ვიდეოებით.

სცენებით, სადაც ჩანს, თუ როგორი მყიფეა რეჟიმის არგუმენტები, მორალი თუ ის მოჩვენებითი სიმამაცე, რომლის ილუზიასაც ის სოციალურ მედიაში გვთავაზობს. როგორ იშლება მილიონიანი პროპაგანდით შეკოწიწებული ტყუილი ერთი ან ორი შეკითხვის დასმით. ყვირილის, ლანძღვის და შეურაცხყოფის გარეშე – მშვიდად, მაგრამ პრინციპულად.

და როგორ ხდება ეს ყოველდღე, სხვადასხვა ადგილას, სხვადასხვა ადამიანების საუბრისას, როგორ იქცევა ეს ჩვეულებრივ ამბად – როგორ ვიწროვდება ტყუილი და უთმობს გზას სიმართლეს.

🧩 პროტესტის დეცენტრალიზებული ფორმა

ეს არის პროტესტის დეცენტრალიზებული ფორმა.

პროტესტში ჩართულ ნებისმიერ ადამიანს შეუძლია აღიჭურვოს არგუმენტებით, შემოიკრიბოს რამდენიმე თანამოაზრე და ელაპარაკოს “ოცნების” ამომრჩეველს – ბაზრობაზე, უნივერსიტეტში, სავაჭრო ცენტრებთან თუ სხვა აქტიურ სივრცეებში.

თუ დაინტერესდები, შემოგვიერთდი ჯგუფში, სადაც ერთმანეთს გამოცდილებას და იდეებს ვუზიარებთ – ერთად მოვიფიქროთ ფორმატები, დახვეწოთ არგუმენტები, შევარჩიოთ ადგილები.

❗ ორი სიტყვით..

დავიცვათ სიმართლე, გამოვააშკარავოთ ტყუილი და ვაჩვენოთ ნეიტრალურ აუდიტორიას თუ რა ემართება რეჟიმის შეკოწიწებულ მორალს და არგუმენტებს დღის სინათლეზე.